Պէյրութի հարաւային արուարձաններուն մէջ, երէկ, Երուսաղէմը Իսրայէլի մայրաքաղաք յայտարարելու Միացեալ Նահանգներու նախագահ Տանըլտ Թրամբի որոշումը դատապարտող եւ Երուսաղէմի եւ Պաղեստինի զօրակցող խաղաղ ցոյց եղած է, որուն մասնակցած են հազարաւոր քաղաքացիներ: Ցոյցը իրականացած էր Հըզպալլայի ընդհանուր քարտուղար սէյիտ Հասան Նասրալլայի կոչով: Այս մասին կը հաղորդէ «Ալ-Ժատիտ» կայանը:

Այս առիթով սէյիտ Նասրալլա երէկ յետմիջօրէին արտասանած ճառին մէջ պաղեստինեան երրորդ ինթիֆատայի կոչ ըրած է, դիմադրութիւնը համարելով Թրամբի յայտարարութեան հակադարձելու լաւագոյն միջոց:

Իր խօսքին մէջ Նասրալլա նաեւ  արաբական կառավարութիւններուն վրայ ճնշում բանեցնելու կոչ ուղղեց՝ Իսրայէլի հետ իրենց դիւանագիտական յարաբերութիւնները խզելու ուղղութեամբ:

Հըզպալլայի ընդհանուր քարտուղարը բարձր գնահատեց տարբեր երկիրներու եւ քաղաքներու մէջ Երուսաղէմի յօգուտ արձանագրուող ժողովրդային բոլոր շարժումները, որոնք մերժեցին ամերիկեան որոշումը: