21.09c
Երեվան
երկ, ապր 28
Մարտի 16–ից 18–ն Ատրպէյճանի Հանրապետութեան պաշտպանութեան նախարարութիւնը 6-րդ հաղորդագրութիւնը տարածած է Հայաստան-Ատրպէյճան սահմանին Հայաստանի բանակի կողմէ իբրեւ թէ հրադադարի ռեժիմի խախտումներու մասին։ Այս առնչութեամբ յայտարարութիւն տարածած է ՀՀ վարչապետի աշխատակազմը։
«Հայաստանի Հանրապետութեան պաշտպանութեան նախարարութիւնը վերը նշուած բոլոր հաղորդագրութիւններից յետոյ իրականացրել է ստուգողական աշխատանքներ եւ ստուգման արդիւնքներով հերքել Հայաստանի բանակի կողմից հրադադարի ռեժիմի խախտման մասին պնդումները։
Այդ բոլոր հերքման հաղորդագրութիւններում ՀՀ պաշտպանութեան նախարարութիւնը յիշեցրել է դեռեւս 2024 թուականի յունիսի 22–ին Հայաստանի Հանրապետութեան վարչապետի աշխատակազմի առաջարկը՝ հրադադարի ռեժիմի խախտման դէպքերի եւ/կամ նման տեղեկութիւնների հետաքննութեան Հայաստան-Ադրբեջան համատեղ մեխանիզմ ստեղծելու մասին, որին Ադրբեջանը մինչեւ օրս դրական չի արձագանգել։
ՀՀ պաշտպանութեան նախարարութեան 2025 թուականի մարտի 17–ի հաղորդագրութեան մէջ արձանագրուել է, որ ՀՀ պաշտպանութեան նախարարութիւնը պատրաստ է հետաքննել Ադրբեջանի հաղորդագրութիւնները հիմնաւորող փաստերը՝ դրանք ՀՀ–ին փոխանցելու պարագայում։
Արձանագրում ենք, որ այս պահի դրութեամբ Ադրբեջանի Հանրապետութեան կողմից Հայաստանի Հանրապետութեանը չի փոխանցուել ՀՀ բանակի կողմից հրադադարի ռեժիմի խախտման ոչ մի փաստական տուեալ կամ հիմնաւորում։
Հայաստանի Հանրապետութեան վարչապետի աշխատակազմը՝ վերահաստատելով հրադադարի ռեժիմի խախտման դէպքերի եւ/կամ նման տեղեկութիւնների հետաքննութեան Հայաստան-Ադրբեջան համատեղ մեխանիզմ ստեղծելու մասին իր առաջարկը, յայտարարում է, որ ՀՀ բանակը հրադադարի ռեժիմի խախտման պատճառ կամ հրահանգ չունի։
Հայաստանի Հանրապետութեան Կառավարութիւնն առաջնորդւում է խաղաղութեան օրակարգով, ինչի անհերքելի ապացոյցն են Հայաստանի Հանրապետութեան եւ Ադրբեջանի Հանրապետութեան միջեւ խաղաղութեան եւ միջպետական յարաբերութիւնների հաստատման մասին համաձայնագրի տեքստի վերջնականացմանն ուղղուած քայլերը։
Խաղաղութեան համաձայնագրի տեքստի համաձայնեցումը եւ տեքստի համաձայնեցման շուրջ բանակցութիւնների աւարտը կարեւորագոյն քայլ է եւ Հայաստանի Հանրապետութիւնն Ադրբեջանի Հանրապետութեանը կոչ է անում մեկնարկել խորհրդակցութիւնները համաձայնագրի ստորագրման տեղի եւ ժամկէտների վերաբերեալ։
Հարկ ենք համարում ընդգծել, որ Համաձայնագրի նախագծի համաձայնեցուած տեքստը հասցէագրում է Հայաստանի եւ Ադրբեջանի միջեւ խաղաղութեան եւ յարաբերութիւնների հաստատման հիմնարար հարցերը եւ մեխանիզմներ է նախատեսում հետագայ անելիքների քննարկման համար։
Անհրաժեշտ ենք համարում արձանագրել նաեւ, որ 2025 թուականի յունուարին Հայաստանի Հանրապետութիւնը գրաւոր կերպով Ադրբեջանի Հանրապետութեանն է փոխանցել Ադրբեջանի արեւմտեան շրջաններից Հայաստանի Հանրապետութեան տարածքով դէպի ՆԻՀ (Նախիջեւանի ինքնավար հանրապետութիւն), հակառակ ուղղութեամբ եւ դէպի երրորդ երկրներ, եւ Հայաստանի Հանրապետութեան հիւսիս–արեւմտեան շրջաններից Ադրբեջանի տարածքով դէպի ՀՀ հարաւային հատուած, հակառակ ուղղութեամբ եւ դէպի երրորդ երկրներ երկաթուղային բեռնափոխադրումների խնդրի լուծման առաջարկ, ինչպէս նաեւ սպառազինութիւնների փոխադարձ վերահսկման երկկողմ մեխանիզմի ստեղծման մասին առաջարկ եւ սպասում է Ադրբեջանի դրական արձագանգին։
Միեւնոյն ժամանակ, վերահաստատում ենք, որ Հայաստանի Հանրապետութիւնը պատրաստ է շարունակել Ադրբեջանի Հանրապետութեան հետ պետական սահմանի սահմանազատման աշխատանքները՝ Հայաստանի Հանրապետութեան եւ Ադրբեջանի Հանրապետութեան միջեւ պետական սահմանի սահմանազատման եւ սահմանային անվտանգութեան հարցերով յանձնաժողովի եւ Ադրբեջանի Հանրապետութեան եւ Հայաստանի Հանրապետութեան միջեւ պետական սահմանի սահմանազատման պետական յանձնաժողովի համատեղ գործունէութեան մասին կանոնակարգի համաձայն», –ըսուած է յայտարարութեան մէջ։
