29.09c
Երեվան
երք, հլս 22
Մեր հիմնական սպասելիքը այն է, որ Նիկոլ Փաշինեանը արդէն փոշմանած է, կը գիտակցի, որ այդպիսի արկածախնդրութիւնը կործանարար հետեւանքներ կրնայ ունենալ մեր երկրի համար, իր քաղաքական ասպարէզի համար նաեւ, եւ ուղղակի ետ կը կանգնի այդ աղէտալի արկածախնդրութենէն։ Այս մասին այսօր՝ յուլիս 22–ին, Մայր Աթոռ Սուրբ Էջմիածնի մօտ լրագրողներու հետ զրոյցին նշած է «Հայաքուէ» ազգային–քաղաքացիական միաւորման համակարգող Աւետիք Չալաբեանը։
«Մենք այստեղ ենք, ըստ էութեան, որպէսզի ցոյց տանք մեր նուիրումը մեր եկեղեցուն, նրա նուիրապետական կարգին, նրա 1700 տարիներով եկած եւ մեզ արդէն հասած ինստիտուցիոնալ յիշողութեանը, ինստիտուցիոնալ խորութեանը եւ մեր ազգային ինքնութեան պահպանութեան հարցում նրա ունեցած առանցքային դերին։
Դա ասելով, ես երբեւիցէ չեմ ենթադրում, որ մեր Եկեղեցին չունի խնդիրներ, որ պէտք է լուծի։ Մեր ամբողջ հասարակութիւնը ունի խնդիրներ, որ պէտք է լուծի, բազմաթիւ խնդիրներ, որոնք կուտակուել են, բայց դա եկեղեցու գործն է, դրսից ցանկացած միջամտութիւն, այն էլ բռնի միջամտութիւն, մեր ամբողջ ազգի համար, ոչ միայն եկեղեցու համար, պարզապէս աղէտալի հետեւանքներ կարող է ունենալ, ուստի մենք այստեղ ենք, որպէսզի այդպիսի միջամտութիւն թոյլ չտանք։ Որովհետեւ այդպիսի միջամտութիւնը բարոյական հարթութեան մէջ բացարձակ սնանկ, սրբապիղծ է, իրաւական հարթութեան մէջ, ապօրինի է, եւ ընդհանրապէս պէտք է տեղի չունենայ, պարզապէս պէտք է տեղի չունենայ։
Մենք պէտք է վերադառնանք նրան, որ մեր ներազգային խնդիրները կարողանանք լուծել փոխադարձ յարգանքի, եթէ նոյնիսկ ոչ համերաշխութեան, առնուազն իրար լսելու, իրար հետ խօսելու, իրար հետ բանավիճելու մեխանիզմով, ոչ թէ բռնութեամբ։ Բռնութիւնը, մեղմ ասած, թոյլերի գործն է, որոնք այլեւս չունեն փաստարկ, չունեն բարոյական ուժ, եւ փորձում են դիմել բռնութեան։ Մենք այստեղ ենք, որպէսզի բռնութիւն թոյլ չտանք»,–ըսած է ան։
Խօսելով վարչապետ Նիկոլ փաշինեանի մասին՝ Չալաբեանն ըսած է. «Փաշինեանը, ըստ էութեան, պաթոլոգիկ վախկոտ է եւ այն ամէնը, ինչ որ նա այս ընթացքում արել է, արել է միայն այն իրավիճակում, երբ որ իր ետեւը զգացել է ժողովրդի ուժը։ Այսօր այդ ուժը իր ետեւը չի։ Բոլոր հարցումները ցոյց են տալիս, որ Փաշինեանի վարկանիշը ընկել է աղէտալի ցածր մակարդակի՝ քաղաքացիների 13-15% է ընդամէնը նրան պաշտպանում եւ այդ թիւը շարունակում է նուազել։
Իր ձախողումները չէզոքացնելու, սքօղելու համար նա երկրի ներսում դիմում է բռնութեան տարբեր մարդկանց նկատմամբ, բռնաճնշումների եւ փորձում է դրանով իր ուժը ցոյց տալ։
Ես կարծում եմ, որ նա ադեկվատ գնահատելով իր հնարաւորութիւնները, իսկ աւելի ճիշդ՝ իր հնարաւորութիւնների բացակայութիւնը, չի դիմի այդ արկածախնդրութեանը, անկախ նրանից, թէ անցեալում ինչ է արել»։
Ինչ կը վերաբերի Էջմիածնի հրապարակին մէջ հաւաք կազմակերպելուն, «Հայաքուէի» ներկայացուցիչն ըսած է. «Ես, անկեղծ կարծում եմ, որ Փաշինեանը չի կարողանալու իրական հետեւորդներ հաւաքել, որովհետեւ այդպիսիք չունի։ Այստեղ Վեհարանի դարպասների դիմաց հաւաքուած կը լինի շատ աւելի մեծ բազմութիւն, որը կը գայ պաշտպանելու իր եկեղեցին, իր հաւատը, իր սրբութիւնները, իր արժէքները։ Ուստի Փաշինեանը ուղղակի այս դարպասներին պարզապէս չի հասնի, հասկանալով, որ եթէ ինքը տանի մարդկանց բախումներին, դա կը լինի իր քաղաքական կարիերայի վերջը»։
