19.09c
Երեվան
հնգ, ապր 03
Մարսէյլի մէջ Ռուսիոյ հիւպատոսութեան մօտ պայթում տեղի ունեցած է, նախնական տուեալներով տուժածներ չկան։ Տեղեկութիւնը յայտնած են ֆրանսական լրատուամիջոցները։
Միջադէպը տեղի ունեցած է վաղ առաւօտեան՝ տեղական ժամանակով մօտաւորապէս 08:00-ին, պայթումի փաստը հաստատած է գլխաւոր հիւպատոս Սթանիսլաւ Օրանսքին։
Ան ըսած է, որ դէպքի վայրի մէջ կ՚աշխատին հրշէջ ծառայութիւններն ու իրաւապահները։
Նշուած է, որ ըստ Valeurs Actuelles ամսագրի թղթակցի՝ հաւանաբար, անյայտ անձինք հիւպատոսութեան տարածքի այգի նետած են հրկիզող խառնուրդով երկու անօթ։ Դէպքի վայրի մօտ յայտնաբերուած է առեւանգուած մեքենայ։
Նախնական տուեալներով՝ առայժմ խօսքը միայն նիւթական վնասի մասին է:
Աւելի վաղ Ռուսիոյ արտաքին հետախուզութեան ծառայութիւնը յայտարարած էր, որ Քիեւը բանակցութիւնները խաթարելու նպատակով կրնայ շարք մը ահաբեկչութիւններ կազմակերպել Եւրոպայի մէջ ռուսական դիւանագիտական ներկայացուցչութիւններու դէմ։
