21.09c
Երեվան
հնգ, ապր 30
Լիբանանի մէջ Հայաստանի դեսպան Վահագն Աթաբէկեան երէկ հանդիպում մը ունեցաւ արտաքին գործոց եւ արտերկրի լիբանանցիներու հարցերու նախարարի պաշտօնակատար Ապտալլա Պու Հապիպի հետ:
Հանդիպումին ընթացքին դեսպան Աթաբէկեան Պու Հապիպէն պահանջեց վերահաստատել Լիբանանի զօրակցական կեցուածքը` Լաչինի միջանցքը վերաբանալու:
Իր կարգին, Պու Հապիպ լուրջ մտահոգութիւն յայտնեց Արցախի մէջ ստեղծուած մարդկային եւ առողջապահական տագնապին, առեւտուրի արգելակումին, ինչպէս նաեւ ապրուստի ճնշող պայմաններուն արձանագրած վատթարացումին մասին, որ հետեւանք է Լաչինի միջանցքի փակումին:
Պու Հապիպ շեշտեց, որ պէտք է Հայաստանի եւ Ազրպէյճանի միջեւ բանակցութիւններու յարմար պայմաններ ստեղծել:
Ան անհրաժեշտ նկատեց Լաչինի միջանցքին բացումը` նկատի ունենալով Արցախի բնակչութեան համար անոր ներկայացուցած կենսական կարեւորութիւնը:
Պու Հապիպ վերահաստատեց Լիբանանի արտաքին գործոց եւ արտերկրի լիբանանցիներու նախարարութեան սկզբունքային կեցուածքը` տագնապները երկխօսութեան ընդմէջէն լուծելու, հեռու մնալով քաղաքական նպատակներ իրագործելու համար քաղաքայիններն ու անոնց մարդկային իրաւունքները ճնշելու միջոցներէն:
