10.09c
Երեվան
ուրբ, նմբ 22
Կարճ ֆիլմերու 7-րդ միջազգային փառատօնը տեղի պիտի ունենայ Երեւանի եւ Տաւուշի մարզին մէջ, Յուլիս 29-էն Օգոստոս 2։
Փառատօնի հովանաւորն է Երեւանի քաղաքապետարանը, աջակիցը՝ Կրթութեան, գիտութեան, մշակոյթի եւ մարմնակրթութեան նախարարութիւնը։ Դատակազմի նախագահն է ֆրանսահայ բեմադիր, բեմագիր Սերժ Աւետիքեան։
Փառատօնի նպատակն է բացայայտել երիտասարդ եւ տաղանդաւոր ստեղծագործողները, նպաստել անոնց մասնագիտական կարողութիւններու զարգացման, տարբեր երկիրներու սինեմայի երիտասարդ գործիչներու բարեկամական եւ ստեղծագործական կապերու ամրապնդման, շարժանկարի նոր սերունդի ձեւաւորման:
«Ուրախ ենք, որ կ՚աջակցինք այս կարեւոր մշակութային ծրագրին։ Երեւանի քաղաքապետարանը մեծ ուշադրութիւն կը դարձնէ շարժարուեստին, այս բնագաւառի զարգացման»,– Յուլիս 26-ին տեղի ունեցած մամլոյ ասուլիսին նշած է Երեւանի քաղաքապետարանի մշակոյթի եւ զբօսաշրջութեան վարչութեան պետի տեղակալ Գէորգ Սահակեան:
Փառատօնի ընթացքին տեղի պիտի ունենան ստեղծագործական հանդիպումներ, քննարկումներ, վարպետութեան դասեր, կլոր սեղաններ, շնորհահանդէսներ, իսկ բոլոր միջոցառումներու մուտքը անվճար է։ Հանդիսատեսը առիթ պիտի ունենայ դիտելու միջազգային հեղինակաւոր փառատօներու մրցանակակիր կարճ ֆիլմերը:
«Փառատօնը այս տարի ստացած է 700-է աւելի դիմում 85 երկիրներէ։ Մրցոյթի ծրագրին մէջ ընդգրկուած է 46 ֆիլմ՝ 20 երկրէ»,– ասուլիսի ընթացքին տեղեկացուցած է Երեւանի կարճ ֆիլմերու միջազգային փառատօնի տնօրէն Գուժ Թադեւոսեան:
