1.09c
Երեվան
հնգ, դկտ 12
Թուրքիոյ մէջ ուղիղ եթերէ հեռացուած է Թուրքիոյ նախագահ Էրտողանը եւ իշխող «Արդարութիւն եւ զարգացում» կուսակցութիւնը (AKP) քննադատող կին դասախօսը: Այս մասին կը հաղորդէ թրքական «Birgün» թերթը, նշելով, որ Մարմարայի համալսարանի դասախօս, դոկտոր, փրոֆեսոր Նուրշէն Մազըճըն, հիւրընկալուած է «Habertürk» հեռուստաընկերութեան «Enine Boyuna» հաղորդաշարին:
Ուղիղ եթերով հեռարձակուող այդ հաղորդման ընթացքին Մազըճըն անդրադարձած է 15 յուլիսի ձախողած յեղաշրջման փորձին: Ան կարծիք յայտնած է, որ նախագահ Էրտողանի կողմէ ժողովուրդին ուղղուած փողոց դուրս գալու կոչը սխալ քայլ էր, քանի որ տուեալ պահուն անոնց անվտանգութիւնը չէր կրնար ապահովել:
«Այն գիշեր բոլոր մահացածներու կեանքը առնուազն նոյն չափով կարեւոր է, որքան Թայէպ Էրտողանի կեանքը», - նկատած է Մազըճըն:
Փրոֆեսորը նաեւ հրաժարած է «շեհիտ» (նահատակ) կոչել այդ օրը զոհուածները՝ պատճառաբանելով, որ այդ կրօնական բովանդակութիւն ունեցող բառ է եւ ինքը, որպէս գիտնական, իրաւունք ունի հրաժարիլ այդ բառի կիրառումէն:
Հաղորդման ներկայ գտնուող ԱԶԿ-ական ներկայացուցիչներու եւ Մազըճըի միջեւ բանավէճ ծաւալած է. իշխանամէտները դասախօսէն պահանջած են ներողութիւն խնդրել իր խօսքերուն համար, իսկ Մազըճըն յամառօրէն պնդած է իր տեսակէտը:
Գովազդային ընդմիջումէն ետք Նուրշէն Մազըճըն այլեւս չէ մասնակցած հաղորդման: Աւելի ուշ Մարմարայի համալսարանը միջադէպի վերաբերեալ ընկերային ցանցերուն մէջ յայտարարութիւն տարածած է: Աւելի ուշ պարզ դարձած է, որ եղած դէպքին առընթեր Նուրշէն Մազըճըի դէմ իրաւական եւ վարչական հետապնդումներ սկսած են:
