Թուրքիա- («Հիւրիյէթ»- Պոլիս) Թուրքիոյ նախագահ Ռէջէպ Թայէպ Էրտողանի կարծիքով Սուրիոյ նախագահ Պաշշար Ասատ կրնայ փոխանցման հանգրուանի մը Սուրիոյ առաջնորդը մնալ: Էրտողան, որ այս մասին խօսած է Ալ Ատհայի տօնին առթիւ Պոլսոյ մէջ տեղի ունեցած կրօնական արարողութեան մը մասնակցելէ ետք նաեւ ըսած է, որ ոչ ոք կրնայ պատկերացնել, որ Ասատ կրնայ մինչեւ վերջ իշխանութեան գլուխը մնալ: Ըստ Էրտողանի Սուրիոյ նախագահը բռնատէր է եւ պատճառ եղած է շուրջ 350 հազար քաղաքացիներու սպաննութեան: Էրտողան խօսելով Մոսկուա կատարած իր վերջին այցին մասին նկատել տուած է, թէ իր եւ Ռուսիոյ նախագահ Վլատիմիր Փութինի Սուրիոյ վերաբերեալ ունեցած մօտեցումները ոչ միայն տարբեր են այլ հակոտնեայ են: Ան նաեւ ըսած է, որ հակառակ առկայ տարակարծութիւններուն Ռուսիոյ եւ Թուրքիոյ արտաքին գործոց նախարարները Սուրիոյ տագնապին լուծումներ որոնելու առընթեր նոր նախաձեռնութեամբ մը հանդէս պիտի գան: