13.23c
Երեվան
երք, հնս 17
Ազունիէի Հայ ազգային բուժարանի Տիկնանց օժանդակ մարմինին (ԱՏՕՄ) կազմակերպած տարեկան ձեռնարկը տեղի ունեցաւ հինգշաբթի, 15 մայիս 2025-ին, կէսօրէ առաջ ժամը 11: 30-ին, Պսալիմ, «Քաունթրի լոճ»-ի մէջ, հովանաւորութեամբ բուժարանի խնամակալութեան, նախագահութեամբ Ալիս Պօղոսեանի:
Լիբանանի եւ Հայաստանի քայլերգներու ունկնդրութենէն ետք յանձնախումբի ատենապետ Թալին Լախեան մայրերու նուիրուած բանաստեղծութեամբ կատարեց ձեռնարկին բացումը, շնորհակալութիւն յայտնեց օրուան նախագահին, հիւրերուն եւ բոլոր ներկաներուն` իրենց աջակցութեան համար:
Ապա խօսք առաւ խնամակալութեան ներկայացուցիչ Սօսի Փոլատեան, որ անդրադարձաւ վերջին երեք տարիներուն խնամակալութեան կատարած իրագործումներուն, ինչպէս` մատուռի նորոգութիւն, արեւային վահանակներու զետեղում, պտղատու ծառերու յաւելեալ հոգատարութիւն: Դրուատեց նաեւ ԱՏՕՄ -ի կողմէ կատարուած ընթացիկ տարուան աշխատանքները, ինչպէս` կրօնական ու ազգային տօներուն առիթներով պատսպարեալներուն համար ստեղծուած հաճելի պահերը, գրադարանի մը ստեղծումը եւ հիւրերու համար վարձու տրուելիք սենեակի մը կահաւորումը: Ան տեղեկացուց, որ ձեռնարկին հասոյթը պիտի յատկացուի փոքր վանի մը գնման:
Ձեռնարկի նախագահ Ալիս Պօղոսեան վերյիշեց իր հայրը` Ցոլակ Թիւթէլեանը, որ երկար տարիներ եղած է բուժարանի խնամակալութեան ատենապետ, պատմեց անոր կապուած յիշատակներուն մասին: Ան շեշտեց, որ իր կապը եւս շատ խոր է բուժարանի պատսպարեալներուն հետ:
Խնամակալութեան ներկայացուցիչները յուշանուէր եւ ծաղկեփունջ յանձնեցին օրուան նախագահուհին:
Այնուհետեւ ցուցադրուեցաւ տեսերիզ մը, ուր ներկայացուեցաւ խնամակալութեան եւ ԱՏՕՄ-ի իրագործած ծրագիրները` նկարներով եւ բացատրութիւններով:
Ապա Թալին Լախեան ասմունքեց «Մօր ձեռքերը» բանաստեղծութիւնը:
Խնամակալութեան անունով երիցուհի Մարիա Պագալեան անդրադարձաւ այն իրականութեան, թէ ինչպիսի՛ դժուարին պայմաններու մէջ Ազգային բուժարանը կանգուն կը պահուի, համատեղ ջանքերով Կիլիկիոյ կաթողիկոսութեան, Հայ աւետարանական եկեղեցւոյ համախմբումին եւ խնամակալութեան: Ան դրուատեց Տիկնանց օժանդակ մարմինի ցարդ իրականացուցած ծրագիրները, տեղեկացուց նաեւ, որ նորակազմ երիտասարդական յանձնախումբը իր առաջին ծրագիրիով գնած է փրոճեքթըր մը, որ հաճելի պահեր պիտի պարգեւէ պատսպարեալներուն: Ան աղօթքով փակեց իր խօսքը:
Իսկական հայկական մշակոյթի վայելքի պահեր ապրեցուցին երիտասարդներէ բաղկացած «Հեքիաթ» խումբին անդամները, որոնք մեկնաբանեցին ժողովրդային եւ ազգագրական սիրուած երգեր:
Այնուհետեւ կատարուեցաւ վիճակաձգութիւն` յունուար-փետրուար 2025-ին ծախուած վիճակահանութեան, բախտաւորուեցան երեք անձեր:
Ձեռնարկի վերջին բաժինով տեղի ունեցաւ օրուան վիճակահանութեան վաճառք: Բախտաւորուեցան ներկաներ` արժէքաւոր նուէրներով:
Ձեռնարկի հաղորդավարութիւնը կատարեց ԱՏՕՄ-ի յանձնախումբի անդամ Լենա Երէցեան:
Ներկաները խանդավառուած ուրախ եւ հաճելի մթնոլորտէն` կատարեցին սրտաբուխ նուիրատուութիւններ, որոնք պիտի ծառայեն լիբանանահայ կեանքի կարեւոր մէկ կառոյցին` Ազունիէի Հայ ազգային բուժարանին:
Լուրը՝ «Ազդակ»էն
