21.09c
Երեվան
երք, հնս 17
Հայաստանի ԱԺ-ն 86 կողմ 0 դէմ ձայներով ընդունեց ՀՀ տարածքային ամբողջականութեան նկատմամբ Ատրպէյճանի ոտնձգութիւնը դատապարտող յայտարարութիւնը, որ հեղինակած էր «Բարգաւաճ Հայաստան» խմբակցութիւնը:
Յայտարարութիւնը ԱԺ արտահերթ նիստին ներկայացուց խմբակցութեան պատգամաւոր Արման Աբովեանը:
Ստորեւ կը ներկայացնենք յայտարարութիւնը.
«ՀՀ ԱԺ յայտարարութիւնը սահմանամեձ գօտիներում, մասնաւորապէս Սիւնիքում եւ Գեղարքունիքում ստեղծուած ճգնաժամային իրավիճակի առկայ խնդիրների եւ դրանց լուծման ուղիների, սահմանների պաշտպանութեան եւ անվտանգութեան ապահովման ուղղուած հարցերի վերաբերեալ:
ՀՀ ԱԺ-ն արձանագրում է, որ 2021-ի մայիսի 12-ին Սիւնիքի մարզի Սեւ լիճ տարածքի ուղղութեամբ Ատրպէյճանի զինուժը իբր սահմանների ճշգրտման եւ որոշակի աշխատանքներ Սիւնիքի սահմանային հատուածներից մէկում կատարելու պատրուակով ներթափանցել է ՀՀ տարածք՝ խորանալով մի քանի քմ դէպի Վերիշէն բնակավայր: Ատրպէյճանի զինուժի մի քանի հարիւր ներկայացուցիչներ այս պահին շարունակում են գտնուել ՀՀ տարածքում՝ Սիւնիքի եւ Գեղարքունիքի մարզեր որոշ հատուածներում: Հայաստանի ԱԽ մայիսի 13-ին տեղի ունեցած նիստում արձանագրուել է, որ արդէն երկրորդ օրն է, որ Սիւնիքի մարզի Սեւ լճի շուրջ եւ մերձակայ տարածքներում ճգնաժամային իրավիճակ է: Ատրպէյճանի զինուժի այս գործողութիւններն անընդունելի են Հայաստանի համար, դա ակնյայտ ոտնձգութիւն է ՀՀ ինքնիշխան տարածքի նկատմամբ եւ ՀՀ-ն որեւէ դէպքում չի հանդուրժի ստեղծուած իրավիճակը:
Հաշուի առնելով Ատրպէյճանի վարած հակահայկական, ռազմատենչ քաղաքականութիւնը, Ատրպէյճանի ղեկավարութեան կողմից Հայաստանի տարածքային ամբողջականութեան նկատմամբ բացայայտ նկրտումները, այդ թուում ուժի կիրառման սպառնալիքներ պարունակող բազմաթիւ յայտարարութիւնները, ինչպէս նաեւ տասնամեակներ շարունակ պետական մակարդակով քարոզուող հայատեացութիւնը, ՀՀ ԱԺ-ն խստագոյնս դատապարտում է Ատրպէյճանի կողմից ՀՀ-ի տարածքային ամբողջականութեան նկատմամբ ոտնձգութիւնները եւ փաստում, որ Ատրպէյճանի կողմից վարուող ակրեսիւ քաղաքականութիւնը խախտում է ՄԱԿ-ի կանոնադրութեամբ ամրագրուած միջազգային իրաւունքի հիմնարար սկզբունքները, ինչը ՀՀ-ին իրաւունք է վերապահում իրականացնել միջազգային իրաւունքով, ՀՀ Սահմանադրութեամբ եւ օրէնսդրութեամբ նախատեսուած համարժէք գործողութիւններ:
ԱԺ-ն որպէս ՀՀ ժողովրդի բարձրագոյն ներկայացուցչական մարմին յայտարարում է՝
Ձեռնարկուելու են վճռական կոշտ գործողութիւններ Ատրպէյճանի ռազմական ակրեսիան կասեցնելու եւ ՀՀ-ի ժողովրդին եւ ինքնիշխան տարածքը պաշտպանելու նպատակով,
Կոչ է անում միջազգային հանրութեանը դատապարտել Ատրպէյճանի կողմից ՀՀ-ի տարածքային ամբողջականութեան դէմ ուղղուած սադրիչ գործողութիւնները, ուժի գործադրման սպառնալիքները, ու փաստացի գործադրումը, որը սպառնում է տարածաշրջանային փխրուն խաղաղութեանն ու անվտանգութեանը»:
