14.09c
Երեվան
շբթ, սպտ 12
Ստամբուլի Շիշլի թաղամասում տարեց հայ զույգի տուն մտած հանցագործները տունը թալանելուց հետո զույգին կապել են մահացու «խոզի կապանքով» ու հեռացել, գրում է new.am-ը՝ հղում անելով Hurriyet-ին:
Ինչպես տեղեկացնում է լրատվամիջոցը, Շիշլիում տարեց հայ զույգի տանը մաքրությամբ զբաղվող աշխատակիցը հերթական այցի ժամանակ տեսնելով, որ տան դուռը բացող չկա, զանգահարել է տարեց ամուսինների ազգականներին, ովքեր անմիջապես ոստիկանություն են հայտնել։
Դեպքի վայր մեկնած հրշեջները պատուհանից ներս են մտել եւ տեսել «խոզի կապանքով» կապված ամուսինների։ Պարզվել է, որ կապված 85-ամյա ամուսինը խեղդվել է, իսկ 79-ամյա կինը ծանր վիճակում է գտնվում։
Հիվանդանոց տեղափոխված տարեց հայ կինը պատմել է, որ տունը թալանել ու իրենց կապել են 3 տղամարդ։
Նշենք, որ սա Թուրքիայում հայ տարեցների նկատմամբ կատարված միակ բռնությունը չէ. 2013-ին Ստամբուլի Սամաթիա հայկական թաղամասում հարձակման են ենթարկել 4 հայ կին, սեփական բնակարանում դաժանորեն սպանվել է 84-ամյա հայուհի Մարիցա Քյուչուքը: 2012-ի դեկտեմբերին կրկին Սամաթիայում 87-ամյա մեկ այլ հայ կին էր դաժան ծեծի ենթարվել և կորցրել տեսողությունը: Երկու տարի առաջ Ստամբուլում իր տանը սպանված է հայտնաբերվել հայկական «Արամյան» դպրոցի ինֆորմատիկայի ուսուցիչ Իլքեր Շահինը:
