10.09c
Երեվան
երք, հկտ 13
Իրանի գերագոյն հոգեւոր պետի աւագ խորհրդականներէն Ալի Աքպար Վիլայէթի յայտնեց, թէ Իրան կը մերժէ Սուրիոյ հարցին շուրջ Ասթանայի ժողովին Ուաշինկթընի մասնակցութիւնը, կը գրէ «Ռոյթըրզ»:
«Ասթանայի ժողովին Ուաշինկթընի մասնակցութիւնը դուռ պիտի բանայ Սուրիոյ կառավարութիւնը տապալել ձախողած դերակատարաներու, ինչպէս նաեւ Սէուտական Արաբիոյ ու Քաթարի ներկայութեան դիմաց», ընդգծեց Վիլայէթի:
Իր կարգին, Իրանի արտաքին գործոց նախարար Մոհամետ Ճաւատ Զարիֆ, անդրադառնալով Միացեալ Նահանգներու մասնակցութեան հարցին՝ յայտարարեց. «Մենք զիրենք չենք հրաւիրած»: Ան ապա աւելցուց. «Իրանն ու Սէուտական Արաբիան Սուրիոյ հարցին շուրջ պէտք է գործակցին»:
Ռուսիոյ արտաքին գործոց նախարար Սերկէյ Լաւրով նախապէս յայտնած էր, որ Մոսկուա ճիշդ կը նկատէ Ղազախստանի մայրաքաղաք հրաւիրել ՄԱԿի եւ Միացեալ Նահանգներու նոր վարչակազմի ներկայացուցիչները: Ան ընդգծած էր, որ ատիկա պիտի ըլլայ նորընտիր նախագահ Տանըլտ Թրամփի վարչակազմին հետ առաջին հանդիպումը, որուն ժամանակ կարելի պիտի ըլլայ սկսիլ Սուրիոյ մէջ ահաբեկչութեան դէմ պայքարին ուղղուած արդիւնաւէտ քայլերու քննարկման:
Նշենք, որ Ասթանայի մէջ Սուրիոյ հարցի լուծման նուիրուած բանակցութիւնները տեղի պիտի ունենան Յունուար 23ին:
