14.09c
Երեվան
երք, մյս 05
Իսրայէլի պաշտպանութեան նախարարը նոր սպառնալիքներ տեղացուցած է Լիբանանի գլխուն: Նախարար Մոշէ Եահալոն արդիական զէնքերու ֆորոմի մը բացման ընթացքին ըսած է, թէ իրենց համար մասնաւորապէս այս հանգրուանին Իրանէն Հըզպալլային ուղղարկուելիք զէնքերու ճանապարհի փակումը դարձած է առաջնային խնդիր: Եահալոն նաեւ դրուատիքով խօսած է «Մոսատ»ի իրականացուցած գործողութեանց մասին, որոնց արդիւնքով Հըզպալլայի բարձրաստիճան ղեկավարներ սպաննուեցան: Այդ դէպքերը կատարուեցան Սուրիոյ մէջ եւ անոնց վերջինը Հըզպալլայի ղեկավարներէն Մուսթաֆա Պատըր Ալ Տինի թաքուն պայմաններու տակ եղած սպաննութիւնն էր: Արաբ-իսրայէլական՝ արդէն 65 տարուան հակամարտութեան մէջ Հըզպալլա յաջողեցաւ պատերազմի նոր կանոններ պարտադրել: Այդ կանոններուն ամէնէն կարեւորը Հըզպալլայի ղեկավարութեան խօսքին իրաւացիութիւնն էր: Ինչ կը վերաբերի Լիբանանին, առաջին անգամը չէ, որ Իսրայէլ կրնայ նախայարձակ պատերազմի դիմել, այդպիսով խառնելով բոլոր խաղաքարտերը եւ փորձել ստեղծելով նոր լարուածութիւն ամբողջ շրջանին մէջ: Սուրիոյ տագնապին մէջ մխրճուած Հըզպալլային համար այս հանգրուանին բաւական ծանր դրութիւն կրնայ ստեղծուիլ, եթէ Իսրայէլ բանայ Լիբանանի հետ իր ունեցած ճակատը: Այլ խօսք, թէ որ կողմի զինուորները ինչ խիզախութեամբ կրնան կռուիլ եւ մինչեւ ո՞ւր կրնայ հասնիլ անոնց կռուելու ոգին: Մէկ բան յստակ է, որ Իսրայէլի այսօրուան սպառնալիքները առաջուան ուժականութիւնը չունին, պարզ անոր համար, որ ոչ միայն պայմանները փոխուած են, այլ Իսրայէլ պետութեան դէմ կռուող Հըզպալլան գաղափարական-կրօնական դրուածքէն բացի ունի մի քանի պատերազմներու մասնակցած ըլլալու կարեւոր կենսափորձ: Արաբական հանրութեան ընդհանուր կեցուածքի նօսրացումին հետ Իսրայէլ այսօր եւս կրնայ նոր արկածախնդրութեան մը դիմել ու այս զարգացումներուն առջեւ մեծագոյն տուժողը պիտի ըլլայ Լիբանանը եւ ոչ՝ Հըզպալլան:
