Լույս է տեսել Անի Ավագյանի «Եվրոպայի և Հայաստանի համաքրիստոնեական մասունքներով ուխտատեղիները` որպես կրոնական տուրիզմի հանգրվաններ» գիրքը: Գրքի խմբագիրը Մանվել սարկավագ Սարգսյանն է, իսկ մեկենասները՝ Տիգրան և Ժաննա Հակոբյանները, որոնք այս հրատարակությունը նվիրել են իրենց ծնողներին: Տեղեկացանք, որ հեղինակ Անի Ավագյանը գրքի պատրաստման աշխատանքները սկսել է 2013 թվականից, երբ սովորում էր Վ. Բրյուսովի անվան լեզվահասարակագիտական համալսարանում:
Ինչպես գրքի՝ օրերս կայացած շնորհանդեսին ներկայացրել է հեղինակը, գիրքը բաղկացած է երեք բաժիններից, որոնցից առաջինում ընթերցողին է ներկայացվում կրոնական զբոսաշրջությունը: Որպես զբոսաշրջության կարևորագույն և ուրույն տեսակ, խոսվում է վերջինիս առանձնահատկությունների, տեսակների և պատմության մասին:
Երկրորդ բաժնում ներկայացված է Եվրոպայի քրիստոնեական կարևոր ուխտատեղիները, այդ թվում ոչ միայն կաթոլիկ, այլ նաև ուղղափառ և ավետարանական եկեղեցիների սրբավայրերը: Խոսվում է նաև այն խոշոր համաքրիստոնեական ուխտավայրերի մասին, որոնք տարեկան 1 միլիոն ուխտավոր են ունենում:
Երրորդ բաժնում անդրադարձ է կատարվում Հայաստանին` որպես համաքրիստոնեական ուխտավայրի: Ներկայացված են տեղի համաքրիստոնեական նշանակություն ունեցող սրբավայրերն ու սրբությունները: Բավականին բովանդակալից խոսվում է գլխավոր սրբություններից մեկը հանդիսացող Տերունակոխ Սուրբ Գեղարդի և վերջինիս երկրպագության օրը համաքրիստոնեական տոն հռչակելու կարևորության մասին:
«Այս գրքույկը միջոց է ընթերցողին ծանոթացնելու քրիստոնեական արժեքներին և համաքրիստոնեական մասուքներին, հասկանալ թե ի՞նչ է իրենից ներկայացնում ուխտագնացությունը, ճանաչել Եվրոպայի և Հայաստանի արժեքավոր ուխտավայրերը, մասնագետների համար յուրահատուկ հնարավորություն է՝ հայերենով ընթերցելու զբոսաշրջության կրոնական տեսակի մասին, բացահայտելու Եվրոպայի և հատկապես Հայաստանի քրիստոնեական արժեքները՝ հետագայում կրոնական զբոսաշրջության ոլորտում Հայաստանը ներկայացնել համաքրիստոնեական արժեքների լույսի ներքո որպես կարևորագույն կրոնական զբոսաշրջության արժեքներ կրող երկիր»,-ասում է գրքի հեղինակ Անի Ավագյանը:
«Եվրոպայի և Հայաստանի համաքրիստոնեական մասունքներով ուխտատեղիները` որպես կրոնական տուրիզմի հանգրվաններ» գրքի խմբագիր Մանվել սարկավագ Սարգսյանն ասում է, որ հայ իրականության մեջ նման ուսումնասիրություն երբևէ չի կատարվել, և Անի Ավագյանի այս աշխատությունն իր տեսակի մեջ համարվում է եզակի և անդրանիկ օրինակը:
«Հեղինակն օգտվել է բավականին մեծ քանակ կազմող օտարալեզու և իհարկե հայալեզու գրականությունից: Փոքր-ինչ չակերտները բացելով հպարտորեն պետք է փաստեմ, որ համաքրիստոնեական նշանակության մասունքների շարքում մեր ազգին բաժին ընկած ժառանգությունը ամենից անգնահատելիների թվին է պատկանում»,-գրքի շնորհանդեսին ասել է Մանվել սարկավագ Սարգսյանը:
Միացիր մեզ Տելեգրամում
Միացիր մեզ Յութուբում
Կիսվել