Ճոն Լենոնը սպանողը յայտարարած է, որ ինքը փառք կ'ուզէր եւ արժանի է մահապատիժի՝ իր «ստոր» արարքին համար:
Այս մասին Մարք Տէյվիտ Չեփմընը ըսած է ի պատասխան պայմանական վաղաժամկէտ ազատման յանձնաժողովի հարցերու, որ 11-րդ անգամ մերժած է անոր վաղաժամկէտ ազատ արձակել: Ինչպէս նախորդ լսումներու ժամանակ, այժմ նոյնպէս 65-ամեայ բանտարկեալը ափսոսանք յայտնած է Լենոնի վրայ կրակելու համար:
«Ես սպանեցի անոր, քանի որ ան շատ, շատ, շատ յայտնի էր, եւ այդ է միակ պատճառը, եւ ես շատ կ'ուզէի համբաւ ձեռք բերել: Շատ եսասիրական մօտեցում էր»,- ըսած է Չեփմընը, ըստ հրապարակուած սղագրութեան:
Չեփմընն իր գործողութիւնները անուանած է «նողկալի» եւ «ատելի»: Ան ըսած է, որ միշտ կը մտածէ այն ցաւի մասին, որ պատճառած է Լենոնի կնոջ՝ Եոքօ Օնոյին:
Չեփմընը Լենոնը գնդակահարած էր 1980 թուականի 8 դեկտեմբերի գիշերը, երբ ան եւ Օնոն կը վերադառնային Վերին Ուեսթ Սայտի իրենց բնակարան: Աւելի վաղ, նոյն օրը, Լենոնը Չեփմընին ինքնագիր տուած էր՝ վերջերս թողարկուած Double Fantasy ալպոմի օրինակի վրայ: «Ան այդ օրն իսկապէս բարի էր իմ հանդէպ»,- ըսած է Չեփմընը: «Ես ոչ մէկ բանի արժանի եմ: Ես արժանի եմ մահապատժի: Երբ դուն միտումնաւոր կը պատրաստես ինչ-որ մէկուն սպանութիւնը եւ գիտես, որ այդ սխալ է, եւ այդ կ'ընես քեզի համար, իմ կարծիքով, այդ արդէն մահապատիժ է»:
Չեփմընը ցմահ ազատազրկման պատիժ կը կրէ Պուֆալոյէն արեւելք գտնուող Վենտէի ուղղիչ գաղութին մէջ:
Մերժելով անոր պայմանական վաղաժամկէտ ազատումը՝ յանձնաժողովը յայտնած է, որ Չեփմընը «չար արարք» գործած է եւ անոր «ամօթը քեզի փառք կը բերէ» արտահայտութիւնը տագնապալի համարած է: