18.09c
Երեվան
ուրբ, մյս 08
«Վերածնուող Հայաստան» կուսակցութեան խորհուրդի 2022-ի 28 նոյեմբերին կայացուցած որոշմամբ՝ կուսակցութիւնը կը դադրեցնէ գործունէութիւնը ՀՀ Ազգային ժողովէն ներս։
Կուսակցութիւնը յայտարարութիւն տարածած է, ուր ըսուած է․ «Կուսակցութեան անդամ չորս պատգամաւորներից երեքը՝ կուսակցութեան նախագահ Վահէ Յակոբեանը, փոխնախագահներ Հռիփսիմէ Ստամբուլեանն ու Ելենա Կիրակոսեանը, օրէնքով սահմանուած կարգով դիմում են ներկայացրել` իրենց մանտաթներից հրաժարուելու վերաբերեալ:
«Վերածնուող Հայաստան» կուսակցութեան անդամ Զեմֆիրա Միրզոեւան, ով ՀՀ 8-րդ գումարման Ազգային ժողովում ներկայացնում է Հայաստանի ասորական համայնքն ու խորհրդարան է անցել ՀՀ ԱԺ արտահերթ ընտրութիւնների «Հայաստան» դաշինքի համապետական ցուցակի երկրորդ մասով ազգային փոքրամասնութիւնների համար նախատեսուած քվոտայով (բաժին), կը շարունակի պատգամաւորական գործունէութիւնը՝ սեփական դիմումի համաձայն ժամանակաւորապէս սառեցնելով կուսակցութեանն իր անդամութիւնը։ Կուսակցութեան խորհրդի նման որոշումն արդիւնք է առաջին հերթին ՀՀ ազգային փոքրամասնութիւնների նկատմամբ յարգանքի եւ նպատակ ունի որեւէ կերպ չխոչընդոտել ազգային փոքրամասնութիւնների խնդիրների բարձրաձայնման ու լուծման ուղղութեամբ հետեւողականութիւնը, որը Զեմֆիրա Միրզոեւայի գործունէութեան կարեւոր մաս է։
«Վերածնուող Հայաստան» կուսակցութեան խորհրդի որոշման համաձայն՝ կուսակցութեան այն անդամները, որոնք ներկայացուած են դաշինքի նախընտրական ցուցակում, պատգամաւորական մանտաթի ստացման հերթը հասնելու պարագայում ազատ են որոշում կայացնելու՝ վերցնել մանտաթը, թէ ոչ։ Մանտաթ վերցնելու որոշում կայացնելու դէպքում տուեալ անձինք պէտք է լքեն կուսակցութեան շարքերը։
«Վերածնուող Հայաստան» կուսակցութեան խորհրդի որոշումը երկար քննարկումների ու խորհրդի անդամների կոնսենսուսի (համաձայնութիւն) արդիւնք է։ Մենք բազմիցս յայտարարել ենք, որ խորհրդարանական գործունէութիւնն ու պատգամաւորական մանտաթները մեզ համար ինքնանպատակ չեն։ Կուսակցութեան ներկայացուցիչներն արել են առաւելագոյնը՝ ԱԺ-ում եւ ԱԺ-ից դուրս առկայ խնդիրները բարձրաձայնելու, իրավիճակի հանգուցալուծման ճանապարհներ փնտռելու ուղղութեամբ։ Եւ, այնուամենայնիւ, այսօր մենք շարունակում ենք մնալ այն կարծիքին, որ բոլոր այն հիմքերը, որոնք ստիպում էին պոյքոթել ԱԺ նիստերն ամիսներ առաջ, շարունակում են արդիական մնալ նաեւ այսօր։
Կուսակցութեան խորհրդի որոշումը նաեւ մեր հանրութեան տարբեր շերտերի հետ շփումների եւ քննարկումների արդիւնք է, եւ առաւել քան վստահ ենք, որ մեր հայրենակիցների, պայքարի մեր ընկերների համար սա ընդունելի ու հասկանալի քայլ է։
«Վերածնուող Հայաստան» կուսակցութիւնը շարունակելու է իր գործունէութիւնը ընդդիմադիր դաշտում՝ կուսակցութեան հռչակած արժէքների ու քաղաքականութեան շրջանակներում։
Միաժամանակ շնորհակալութիւն ենք յայտնում ՀՀ ԱԺ «Հայաստան» խմբակցութեան մեր գործընկերներին՝ անցած ճանապարհի ու համատեղ աշխատանքի համար՝ մաղթելով յաջողութիւն իրենց գործունէութեան ու պայքարի մէջ։
Վստահ ենք՝ ընդդիմադիր դաշտի մեր գործընկերների հետ փոխգործակցութիւնը շարունակական կը լինի նաեւ ապագայում՝ հիմնուած ընդհանուր գաղափարների ու միասնական նպատակների վրայ»։
