25.09c
Երեվան
հնգ, հնս 26
Պէյրութի «Ազդակ»էն կը կարդանք՝ Լիբանան-Իսրայէլ ծովային սահմանագծումի թղթածրարին թնճուկները կը շարունակեն մնալ անքակտելի, նկատի ունենալով Իսրայէլի մերժումը` ամերիկացի բանագնաց Էյմըս Հոքշթայնի պատրաստած համաձայնագիրին մասին Լիբանանի կատարած դիտողութիւններուն:
Բայց եւ այնպէս ամերիկեան վարչակազմին կողմէ այդ թնճուկները լուծելու ճիգերը կը շարունակուին:
Այս մասին խորհրդարանի նախագահ Նեպիհ Պըրրի յայտնեց, որ իսրայէլեան մերժումին մասին յուշող լրատուական յայտարարութիւններով չի տարուիր, այլ` կը սպասէ Հոքշթայնի հաղորդելիք տեղեկութիւններուն:
Պըրրի նկատել տուաւ, որ Լիբանանի կատարած դիտողութիւնները փոքր մատնանշումներ են, որոնք Հոքշթայնի հետ քննարկուած են, նախքան` պաշտօնապէս ու գրաւոր կերպով անոր յղումը: «Հետեւաբար ներկայիս պատահածը իսրայէլեան ներքին ընտրական տարակարծութիւններ են եւ պայքարի եղանակներ, որոնք զիրենք չեն հետաքրքրեր», յայտնեց ան:
Պըրրի ըսաւ, որ Լիբանան Հոքշթայնէն պաշտօնական պատասխանի կը սպասէ, որպէսզի ըստ այնմ որոշում կայացնէ:
Այս շրջագիծին մէջ կը նախատեսուի, որ Հոքշթայն ամէնէն արագ ժամանակամիջոցին խորհրդարանի փոխնախագահ Էլիաս Պու Սաապին յանձնէ համաձայնագիրին մասին Իսրայէլի դիտողութիւնները:
Ամերիկացի պատասխանատու մը «Ռոյթըրզ» լրատու գործակալութեան յայտնեց, թէ Լիբանան եւ Իսրայէլ մուտք գործած են ծովային սահմանագծումի անուղղակի բանակցութեանց վճռորոշ փուլ մը` աւելցնելով, որ Ուաշինկթըն յանձնառու կը մնայ որոշ լուծման յանգելու եւ կը հաւատայ, որ մնայուն համաձայնութեան հաստատումը կարելի է:
«Իսրայէլ հայոմ» օրաթերթին համաձայն, իսրայէլեան իշխանութիւնները կը պատրաստուին մօտիկ ապագային, հաւանաբար յառաջիկայ շաբաթասկիզբին` Քարիշի հարթակէն կազ մղելու փորձ մը կատարելու:
