18.09c
Երեվան
չրք, մրտ 12
Հայաստանի խորհրդարանը պարտաւոր է արձագանգել ու գնահատական տալ Թուրքիոյ ու Ատրպէյճանի խորհրդարաններուն կողմէ վաւերացուած «Շուշիի հռչակագրին»: Այս մասին Ֆէյսպուքի իր էջով գրած է ԱԺ «Հայաստան» խմբակցութեան պատգամաւոր Անդրանիկ Թեւանեանը:
Ան մասնաւորապէս նշած է. «Այդ փաստաթղթի դրոյթներով մարտահրաւէր է նետուած ՀՀ անկախութեան հռչակագրին, Հայաստանի ու Արցախի գոյութեանը:
Պլեֆ են այն խօսակցութիւնները, թէ, իբր, Թուրքիայից դրական ազդակներ են գալիս ու հայ–թուրքական յարաբերութիւնները կարգաւորելու ներկայ գործընթացն, իբր, առանց նախապայմանների է:
«Շուշիի հռչակագիրը» վաւերացնելով` Ատրպէյճանն ու Թուրքիան լրիւ այլ ազդակներ են հաղորդում եւ այդ ազդակներին Հայաստանից համարժէք արձագանգ պէտք է լինի»:
Այնուհետեւ պատգամաւորը ներկայացուցած է ԱԺ յայտարարութեան նախագիծը, որ դրած են շրջանառութեան մէջ եւ կ'առաջարկեն խորհրդարանին ընդունիլ զայն:
«ՀՀ ԱԺ յայտարարութիւնն Ատրպէյճանի եւ Թուրքիայի խորհրդարանների կողմից «Շուշիի հռչակագրի» վաւերացման կապակցութեամբ
Հայաստանի Հանրապետութեան Ազգային ժողովն իր խոր մտահոգութիւնն է յայտնում օկուպացուած Շուշիում 2021թ․ Յունիսի 15–ին Թուրքիայի ու Ատրպէյճանի նախագահների ստորագրած հռչակագրի` Ատրպէյճանի եւ Թուրքիայի խորհրդարանների կողմից վաւերացման կապակցութեամբ:
Այդ հռչակագրով կնքուել է թուրք–ատրպէյճանական ռազմաքաղաքական դաշինք` «մէկ ազգ, երկու պետութիւն» հայեցակարգի շրջանակներում:
Թէեւ փաստաթղթում նշուած է, որ այն չի ստեղծուել երրորդ կողմի դէմ, այդուհանդերձ դրա ողջ բովանդակութիւնն ուղղուած է Հայաստանի ու Արցախի Հանրապետութիւնների, հայ ժողովրդի դէմ: Այն արձանագրում է Արցախի Հանրապետութեան դէմ 44-օրեայ յարձակման իրականացրած երկու պետութիւնների ռազմավարական նպատակներն` ընդդէմ Արցախի ժողովրդի ինքնորոշման, Հայաստանի Հանրապետութեան ինքնիշխանութեան, տարածքային ամբողջականութեան եւ ցեղասպանութիւն վերապրած աշխարհասփիւռ հայ ժողովրդի իրաւունքների:
Հռչակագրում տեղ գտած «Զանգեզուրի միջանցքի» վերաբերեալ ձեւակերպումները վկայում են, որ Թուրքիան եւ Ատրպէյճանը ձեռք են բերում հրապարակային պայմանաւորուածութիւններ համատեղ ծաւալապաշտական ծրագրեր իրականացնելու համար:
Դատապարտելի է երկու պետութիւնների պայմանաւորուածութիւնը` պայքարելու Հայոց ցեղասպանութեան միջազգային ճանաչման դէմ` հարցի բովանդակութիւնը խեղաթիւրելով եւ այն տանելով պատմագիտական ուսումնասիրութեան տիրոյթ:
Շուշիի հռչակագրի հիմքում ընկած է ոչ թէ ՄԱԿ կանոնադրութիւնը կամ ԵԱՀԿ-ի կողմից ընդունուած անվտանգութեան սկզբունքը, այլ «ցեղային անվտանգութեան» մօտեցումը: Այն հակասում է միջազգային իրաւունքի հիմնական նորմերին: Համաձայն Միջազգային պայմանագրերի իրաւունքի մասին 1969թ․ Վիեննայի ուխտի` միջազգային բոլոր պայմանագրերը, որոնք հակասում են ընդհանուր միջազգային իրաւունքի իմպերատիւ կանոններին, առոչինչ են եւ չեն կարող ունենալ որեւէ միջազգային լեգիտիմութիւն:
ՀՀ Ազգային ժողովը յայտարարում է`
Շուշիի հռչակագիրը` իր սադրիչ եւ ապակառուցողական բնոյթով, անընդունելի է ՀՀ-ի համար: Այն լրջագոյն մարտահրաւէր է տարածաշրջանային ու ընդհանուր անվտանգութեանը, չի նպաստում մեր տարածաշրջանի խաղաղ զարգացմանը, հակասում է «առանց նախապայմանների» սկզբունքի հիման վրայ հայ–թուրքական յարաբերութիւնների կարգաւորմանը ու լուրջ կասկածներ առաջացնում պաշտօնական Անգարայի իրական վարքագծի ու մտադրութիւնների առումով»:
