Սէուտցիք պիտի «թարմացնեն» իրենց զէնքերը

Սէուտցիք պիտի «թարմացնեն» իրենց զէնքերը

Financial Times-ը, յղում ընելով բարձրաստիճան աղբիւրներու, կը յայտնէ, որ «Սէուտական Արաբիան Պարսից ծոցի շարք մը երկիրներէ խնդրած է օգնել իրեն աւելցնելու Patriot խափանող հրթիռներու պաշարները»։

Պարբերականը իր զեկոյցին մէջ բացատրած է, որ Սէուտական Արաբիոյ խնդրանքը պայմանաւորուած է «թագաւորութեան վրայ Եմէնի զօրքերուն կողմէ ձեռնարկուող ահագնացող յարձակումներով»։

Պարբերականը մէջբերած է ԱՄՆ անյայտ բարձրաստիճան պաշտօնեային խօսքերը. «Սա հրատապ խնդիր է: Ռիատը կրնայ խափանող հրթիռներ ստանալ Պարսից ծոցի շարք մը երկիրներէ, եւ մենք կ'աշխատինք այդ ուղղութեամբ: Այս տարբերակը կրնայ աւելի արագ ըլլալ, քան ուղղակի վաճառքը Միացեալ Նահանգներէն:

Նոյն աղբիւրը յաւելած է, որ «Սէուտական Արաբիոյ հրթիռային զինանոցը կրնայ սպառիլ քանի մը ամսուայ ընթացքին», նշելով որ «այլ երկիրներէ Patriot հրթիռներու ձեռքբերումը պէտք է կատարուի ԱՄՆ վարչակազմին հաւանութեամբ»։

Բանակցութիւններու ընթացքին ծանօթ այլ աղբիւր մը պարզաբանած է, որ Սէուտական Արաբիան այդ հրթիռները խնդրած է «Ծոցի ընկերներէն», սակայն անոնց պաշարները մեծ չեն։

Պարբերականը նաեւ նշած է, որ «պարզ չէ, եթէ մինչ այժմ Սէուտական Արաբիոյ հարեւանները կրցած են զինամթերք մատակարարել անոր»:

Իսկ ամերիկեան The Wall Street Journal թերթը աւելի վաղ յայտնած էր, որ Սէուտական Արաբիոյ կառավարութիւնը շտապ կը դիմէ Միացեալ Նահանգներուն եւ Պարսից ծոցի իր դաշնակիցներուն, ինչպէս նաեւ Եւրոմիութեան՝ իրեն կրկին զինամթերք մատակարարելու, որ կ'օգտագործէ Եմէնի մէջ «Անսարալլա»ի հետ առճակատման համար:

Ան նշած է, որ ամերիկացի եւ սէուտցի պաշտօնեաները ըսած են, որ Սէուտական Արաբիոյ կողմէ պաշտպանութեան համար օգտագործուող զինամթերքը շուտով պիտի սպառի, եւ որ խափանող հրթիռներու զինանոցը լրջօրէն նուազած է, եւ այդ կ'անհանգստացնէ Ռիատը։