12.09c
Երեվան
շբթ, մյս 16
Ռուս-վրացական սահմանի մօտակայքը սկսած է ինը քիլոմեթրանոց փապուղիի շինարարութիւնը: Այսօր պաշտօնական միջոցառում տեղի ունեցած է Քազպեկիի քաղաքապետարանի մէջ (Մցխեթա-Մթիանեթիի շրջան), այս մասին jnews.ge-ի հաղորդմամբ՝ յայտնած է Վրաստանի կառավարութեան մամլոյ ծառայութիւնը:
Խաչաձեւ լեռնանցքի տակ փորուող փապուղին` Ծկղերէ գիւղէն մինչեւ Քոպի գիւղը, Քուեշեթի-Քոպի նոր ճանապարհի ամենաբարդ երկրաչափական կառոյցներէն մէկն է: Անոր տրամագիծը 15 մեթր է:
«Սա Անդրկովկասի ամենամեծ փապուղին է, որու երկարութիւնը 9 քիլոմեթր է, եւ անիկա եզակի է իր կարգաւորումներով», – միջոցառման ժամանակ յայտարարած է Վրաստանի վարչապետ՝ Իրաքլի Ղարիպաշվիլին
Օգտագործելով Քուեշեթի-Քոպի ճանապարհը՝ վարորդները կը կարողանան շրջանցել Մցխեթա-Ստեփանծմինտա-Լարս ճանապարհի ամենախնդրայարոյց` Քոպի-Կուտաուրի հատուածը, որ ձմրան յաճախ փակ է ձիւնահիւսի վտանգի պատճառով: Վարչապետը յիշեցուցած է, որ մայրուղիով ամէն օր կ'անցնի 3-4 հազար ինքնաշարժ, որոնցմէ 30 տոկոսը բեռնատարներ են:
«Սա իսկապէս դարու նախագիծ է, քանի որ այս ճանապարհը տարուայ ընթացքին փակ է մօտ հարիւր օր, եւ մեր բնակչութիւնը չի կրնար տեղաշարժիլ: Ըստ այդմ, այս նախագիծը կարեւոր է ե՛ւ մեր երկրին, ե՛ւ բնակչութեան, ե՛ւ ամբողջ տարածաշրջանին համար», – ըսած է Ղարիպաշվիլին:
Ընդհանուր, Քուեշեթի-Քոպի ճանապարհին վրայ պէտք է կառուցուի հինգ կամուրջ եւ հինգ փապուղի: Ճանապարհի երկարութիւնը 23 քիլոմեթր է, ինչ որ 11 քիլոմեթրով պակաս է գոյութիւն ունեցող ճանապարհի երկարութենէն: Այս ճանապարհով ժամանակը պէտք է կրճատուի 1 ժամով:
Քուեշեթի-Քոպի ճանապարհի նախագիծի արժէքը 1,2 միլիառ լարի է: Շինարարութիւնը կը ֆինանսաւորուի Ասիական զարգացման դրամատան եւ Վերակառուցման եւ զարգացման եւրոպական դրամատան կողմէ: Ծրագրուած է, որ նախագիծը իր աւարտին հասնի մինչեւ 2024:
