20.09c
Երեվան
երք, սպտ 01
Միացեալ Նահանգներու Արեւմտեան Թեմի Լիբանանի կարիքներուն հասնելու արշաւը կը շարունակուի։
Օրեր առաջ «Արեւելք» գրած էր Ամերիկահայ Ազգային բարերար Մայք Սարեանի կատարած բարեգործութեան մասին, իսկ այսօր վերահասու դարձանք նոյնանման բարեգործութեան մը մասին, որուն հեղինակն է ամերիկահայ ազգայիններէն՝ Տիար Կարպիս Պէզճեան։
Ստորեւ այդ առթիւ ներկայացուած տեղեկութիւնը, որ քաղած ենք Թեմի դիմատետրի պաշտօնական էջէն։
Արեւմտեան Թեմի բարեջան Առաջնորդ՝ Գերշ. Տ. Թորգոմ Ս. Եպս. Տօնոյեան, Ն.Ս.Օ.Տ.Տ. Արամ Ա. Վեհափառ Հայրապետի հռչակած «Սփիւռքի Տարուան» ծիրէն ներս, մնայուն կ՛աշխատի, յանուն մեր ժողովրդեան, առաւելագոյնս ձեռք երկարել լիբանանահայ տագնապահար գաղութին:
Այսօր՝ Շաբաթ, 5 Փետրուար 2022, Առաջնորդ Սրբազան Հօր նոյնատիպ երկրորդ նախաձեռնութիւն-առաջարկին ընդառաջեց՝ Արեւմտեան Թեմի Ազգային վարչութեան անդամ Կարպիս Պեզճեան, որ ստանձնեց Լիբանանի Ազգ. վարժարաններ յաճախող հարիւր (100) նոր աշակերտներու կրթաթոշակին հովանաւորութիւնը, 2022-2023 տարեշրջանի համար:
Ա.Մ.Ն. Արեւմտեան Թեմը, Թորգոմ Եպս.ի Գլխաւորութեամբ եւ իր Կրօնական Ժողովով, Ազգային վարչութեամբ եւ ծուխերով խորապէս կը զգայ լիբանանահայութեան ներկայ ծանր իրավիճակը եւ զանազան միջոցներով կը փորձէ մեղմել Լիբանանի մերազն ժողովուրդի ցաւերը:
Վարձքը կատար՝ բոլոր զօրակից եւ հայանուէր բարերարներուն, հովանաւորներուն եւ յայտ ու անյայտ բոլոր անոնց, որոնք օգնութիւն կը ցուցաբերեն հայ ազգի ուշադրութեան կարօտ հատուածներուն:
