2.09c
Երեվան
ուրբ, փտր 27
Իրաքի «Արեւելք»ի աղբիւրէն վերահասու կը դառնանք, որ Մայր Աթոռ Սուրբ Էջմիածնի միաբաններէն՝ Հոգշ. Տ. Օշական վրդ. Կուլկոլեան ընտրուած է Առաջնորդ։
Կը նշուի նաեւ, որ Ամերիկայի Միացեալ Նահանգներու մէջ հոգեւոր ծառայութիւն իրականացնող հայր սուրբը յառաջիկայ օրերուն պիտի ժամանէ Պաղտատ ստանձնելու իր պարտաւորութիւնները։
Յիշեցնենք, որ Իրաքի Հայոց Թեմը երկար տարիներէ ի վեր ձեռնահասօրէն կը վարէր Տ. Աւագ արք. Ասատուտրեանը, որ նաեւ մեծ աւանդ ունեցած է Իրաքի մէջ հոգեւոր ծառայութեան համար երիտասարդներ հաւաքագրելու յոյժ կարեւոր աշխատանքին մէջ։
Ոչ միայն այդ, Տ. Աւագ արք. Կարեւոր պաշտօններ ստանձնած է Իրաքի համաքրիստոնէական պրիսմակին մէջ հանդիսանալով Իրաքի Քրիստոնեայ համայնքներու խորհուրդի նախագահ։
Տեղին է նշել, որ օրերս Իրաքեան Քիւրտիստանի Տըհոք քաղաքին մէջ տեղի ունեցած է Սրբազանը պատուելու յատուկ միջոցառում, որուն մասին ալ կարճ գրառում մը կատարած է Տըհոքի հոգեւոր հովիւ Արժ. Տ. Մասիս քհնյ. Շահինեանը, որ մասնաւորապէս գրառած է՝ «Մեր սրտի խորքերէն երախտագիտութեան խօսք Գերշ. Տ. Աւագ արք. Ասատուրեանին , որ 43 երկար տարիներու ընթացքին քրիստոսաւանդ ծառայութեան մատուցեց Իրաքի Հայոց Թեմին։
Այդ ծառայութիւնը լի էր ձեռքբերումներով, որոնցով կը հպարտանայ ամբողջ իրաքահայութիւնը։ Մեր աղօթքները կը միացնենք յանուն Սրբազան Հօր- երկար կեանք, առողջութիւն մաղթելով եւ աղօթելով, որ անոր ստուերը տեւական ըլլայ ըլլայ մեր գլխու վրայ»։
