20.09c
Երեվան
երկ, ապր 27
Ես չեմ կարծեր, որ մէկ ընտրութեամբ կարելի է դատել՝ ով է ընդդիմութիւն, ով է իշխանութիւն, բայց սա հարցերու հարցը չէ: Այս մասին Արցախի հանրային հեռուստաընկերութեան տուած հարցազրոյցին ըսած է Արցախի Ազգային Ժողովի նորընտիր նախագահ Դաւիթ Իշխանեանը՝ պատասխանելով այն հարցին, որ այսօր տեղի ունեցած ընտրութիւնը արդեօք կը փաստէ, որ Արցախի Ազգային Ժողովէն ներս ընդդիմադիր է միայն «Միասնական հայրենիք»-ը:
«Ընդհանրապէս մենք դասական իրավիճակում չենք գտնւում եւ պէտք է զերծ մնանք դասական այն գնահատականներից ու մեկնաբանութիւններից, նաեւ այն պատկերացումներից, որ լինում է դասական իրավիճակում: Իսկ երէկուայ ընտրութիւնները դա պարզապէս քաղաքական դիրքորոշում էր, որ ցոյց տուեց «Միասնական հայրենիք»-ը, միւս խմբակցութիւններն էլ բնականաբար իրենց տեսակէտներն ունէին եւ դրանով արտացոլուեց մեր քաղաքական կուսակցութիւնների ընդհանուր պատկերացումները՝ ապագային միտուած»,-ըսած է ան:
Իշխանեան նշած է, որ իրավիճակը ֆորսմաժորային է եւ իր թեկնածութիւնն ալ Արցախի Հանրապետութեան նախագահը առաջադրած է. «Իմ համար շատ ծանր էր, երբ որ նախագահի կողմից առաջադրուեց իմ թեկնածութիւնը, բայց դրան նախորդել է խորհրդատւութիւններ՝ խորհրդարանում ներգրաւուած քաղաքական ուժերի ղեկավարների մակարդակով, պատգամաւորական խմբակցութիւնների հետ, եւ երկուստեք՝ նախագահի առաջարկն ու Արցախի ՀՅԴ կեդրոնական կոմիտէի համատեղ որոշումը արտօնելու Դաւիթ Իշխանեանին, աւարտուեց խորհրդարանի նախագահի ընտրութեամբ»:
Դաւիթ Իշխանեանի համոզմամբ այսօրուայ ընտրութեան նպատակը նանեւ ընդհանուր համախմբման միտումն էր՝ ներքին դաշտում, արտաքին դաշտում՝ համահայկական առումով:
«Մեզ համար ներքին կայունութիւնը շատ կարեւոր եւ անհրաժեշտ էր եւ դրանում մենք ունենք մեր դերակատարութիւնը»,- ըսած է ան:
