0.09c
Երեվան
ուրբ, դկտ 26
Գերագոյն հոգեւոր խորհուրդը հանդէս եկաւ յայտարարութեամբ
Նոյեմբերի 1-4-ը Ն․Ս․Օ․Տ․Տ․ Գարեգին Երկրորդ Ամենայն Հայոց Կաթողիկոսի նախագահութեամբ Մայր Աթոռ Սուրբ Էջմիածնում գումարուած Գերագոյն հոգեւոր խորհրդի ժողովին անդրադարձ կատարուեց Հայաստանի Հանրապետութեան եւ Արցախի Հանրապետութեան շուրջ ստեղծուած ծանր իրավիճակին: Քննարկումների արդիւնքում Գերագոյն հոգեւոր խորհուրդը հանդէս եկաւ յայտարարութեամբ:
Յայտարարութիւն
Խորը մտահոգութիւն ենք արտայայտում Հայաստանի եւ Արցախի նկատմամբ Ադրբեջանի շարունակուող ագրեսիայի` մասնաւորաբար 2020թ․ 44-օրեայ եւ 2022թ․ սեպտեմբերի 13-ին սանձազերծուած պատերազմի հետեւանքով Հայաստանի եւ Արցախի Հանրապետութիւններին սպառնացող լրջագոյն մարտահրաւէրների, հայկական երկու պետութիւնների շուրջ ծաւալուող աշխարհաքաղաքական ու տարածաշրջանային անբարենպաստ զարգացումների առնչութեամբ:
Մեծապէս անհանգստացած ենք մեր ժողովրդի կեանքում հոգեւոր-բարոյական արժէքների աղճատման, ինքնութեան ճգնաժամի, ներհասարակական բեւեռացուածութեան, ապագայի հանդէպ անորոշութեան ու տագնապի զգացումների ահագնացման, արտագաղթի տրամադրութիւնների աճի դրսեւորումներով, որոնք իրենց քայքայիչ ներգործութեամբ դժուարացնում են առկայ գոյաբանական մարտահրաւէրների յաղթահարումը:
Մեր աղօթքն ենք մատուցում առ Աստուած ու քաջալերանքը յղում Հայոց բանակի քաջարի զինուորներին եւ սահմանամերձ բնակավայրերի հերոսական ժողովրդին, որ բացառիկ նուիրումով ու անձնազոհութեամբ դիմագրաւում են թշնամական ոտնձգութիւններին ու յարձակումներին:
Ամբողջական զօրակցութիւն ենք բերում Արցախի մեր ժողովրդին` իր ինքնորոշման իրաւունքի պահանջատիրութեան մէջ, որն արտայայտուած է Արցախի Հանրապետութեան Ազգային Ժողովի օրէր առաջ կատարած յայտարարութիւնում, եւ վերահաստատում, որ Արցախի ժողովրդի ինքնորոշման իրաւունքն անսակարկելի է:
Ողջունում ենք միջազգային հանրութեան եւ բարեկամ երկրների ջանքերը` ուղղուած տարածաշրջանում կայունութեան եւ խաղաղութեան հաստատմանը եւ բանակցութիւնների միջոցով առկայ հակամարտութեան խաղաղ հանգուցալուծմանը: Խաղաղ կարգաւորման գործընթացի շրջանակներում առաջնահերթ պէտք է նկատուի ռազմագերիների եւ պահուող քաղաքացիական անձանց ազատ արձակումն ու զոհուածների մարմինների վերադարձը:
Երախտագիտութեամբ կարեւորում ենք խաղաղապահ ուժերի առաքելութիւնը Արցախում` մեր ժողովրդի անվտանգութեան ապահովման գործում:
Կոչ ենք ուղղում Հայաստանի Հանրապետութեան իշխանութիւններին` ամենայն ջանք ի գործ դնել ազգային մեր կեանքում բաժանարար գծերը վերացնելու, քաղաքական համոզմունքներով պայմանաւորուած խտրական մօտեցումները դադարեցնելու, ատելութեան եւ թշնամանքի մթնոլորտը յաղթահարելու, ազգային բոլոր շրջանակների ներգրաւմամբ բովանդակային առողջ երկխօսութիւն նախաձեռնելու ուղղութեամբ, որպէսզի կարելի լինի համազգային համախմբմամբ ապահովել Հայաստանի Հանրապետութեան եւ Արցախի Հանրապետութեան անվտանգութիւնը, վերականգնել տարածքային ամբողջականութիւնը, կանխել մարդկային ու տարածքային հնարաւոր նոր ցաւալի կորուստները եւ միջազգային հարթակներում հետեւողականօրէն պաշտպանել Արցախի ժողովրդի ինքնորոշման իրաւունքը:
Այս մարտահրաւէրների յաղթահարումը կենսական է ու գոյաբանական եւ պահանջում է անմնացորդ զոհողութիւն իշխանութիւններից, Եկեղեցուց, ազգային կառոյցներից եւ համայն մեր ժողովրդից: Հայրենիքը ազգի յարատեւութեան երաշխիքն է, ուստի երկիրը ծայրաստիճան ճգնաժամային իրավիճակից դուրս բերելու համար պէտք է բացառել ամէն հատուածական ձգտում եւ շահ:
Յորդորում ենք հայրենաբնակ եւ աշխարհասփիւռ ողջ հայութեանը համախմբուել ի պաշտպանութիւն Հայաստանի ինքնիշխանութեան ու տարածքային ամբողջականութեան եւ Արցախի ինքնորոշման իրաւունքի:
Պատմութեան ընթացքում բազմիցս բախուել ենք առաւել դժուարին իրավիճակների, սակայն Աստծոյ կամօք մեր ժողովուրդը ի գին բազում զոհողութիւնների, իր ազգային բարձր գիտակցութեամբ ու անսասան հաւատով, միասնականութեամբ եւ աշխատասիրութեամբ կարողացել է յաղթահարել ամէն դժուարութիւն եւ կերտել իր նոր կեանքը: Աստծոյ ողորմութեամբ մեր ժողովուրդը այս փորձութիւնը եւս արժանապատուօրէն պիտի յաղթահարի:
Աղօթում ենք պատերազմի հետեւանքով զոհուած, վիրաւորուած, գերեվարուած, անյայտ կորած հայորդիների եւ բռնի տեղահանուած ընտանիքների համար` Ամենախնամ Տիրոջ զօրակցութիւնն ու մխիթարութիւնը հայցելով վշտացեալ ու տագնապահար բոլոր հոգիներին եւ մեր ողջ ժողովրդին:
Թող Ամէնողորմ Աստուած խաղաղութիւն պարգեւի աշխարհին համայն եւ համերաշխութեան մէջ պահի ազգերին ու ժողովուրդներին` Իր սիրոյ ու հաշտութեան շնորհը հեղելով մարդկային սրտերում ու հոգիներում:
