Եւրասիական տնտեսական միութեան անդամ պետութիւններու վարչապետները Երեւանի մէջ են՝ մասնակցելու Եւրասիական միջկառավարական խորհուրդի նիստին: Այսօր առաւօտեան անոնց դիմաւորած է ՀՀ վարչապետ Նիկոլ Փաշինեանը։
Նիստին կը մասնակցի նաեւ Իրանի փոխնախագահ Մոհամմատ Ռեզա Արեֆը: Ինչպէս յայտնի է, անցեալ տարուան դեկտեմբերին ԵԱՏՄ-ի եւ Իրանի միջեւ ստորագրուած է ազատ առեւտուրի գօտիի մասին համաձայնագիր:
«Հնգեակի» պետութիւններու վարչապետները պիտի քննարկեն միութեան շրջածիրէն ներս տնտեսական համագործակցութեան հարցերու լայն շրջանակ: Նիստի օրակարգի մէջ ընդգրկուած է 20 հարց, որմէ 5-ը պիտի քննարկուին նեղ կազմով: Մասնաւորապէս, կողմերը պիտի քննարկեն արդիւնաբերական համագործակցութեան հիմնական ուղղութիւնները մինչեւ 2030 թուականը, ապրանքներու փոխանակման շուկայի ձեւաւորման հայեցակարգն ու տեղեկատւութեան փոխանակման կանոնները:
Յատուկ ուշադրութիւն պիտի դարձուի ներքին շուկայի գործունէութեան, արդիւնաբերական, փոխադրային, մաքսասակագնային, գիւղատնտեսական եւ ուժանիւթի ոլորտներու մէջ փոխգործակցութեան զարգացման հարցերուն: Միջկառավարական խորհուրդի շրջածիրէն ներս նախատեսուած են նաեւ շարք մը երկկողմ հանդիպումներ։
Եւրասիական տնտեսական միութիւնը միջազգային համարկման տնտեսական միաւորում է, որ կը գործէ 2015 թուականի յունուար 1-էն: Միութեան անդամներն են Ռուսիան, Հայաստանը, Պելառուսիան, Ղազախստանն ու Ղրղզստանը: