15.68c
Երեվան
երկ, մյս 19
«Արեւելք» (Այնճար) Լիբանանէն տխուր լուր ստացանք:
Օրերս իր մահկանացուն կնքած է Այնճարի շրջանակներուն մէջ սիրուած, ծառայասէր, ազգասէր եւ ուղղամիտ Փանոս Արամ Ֆէսլեանը:
Հանգուցեալը ծնած է 1946-ին Այնճար, Հայաստան ներգաղթի օրերուն եւ կնքահայրը փափաքած է մանուկը կնքուի նախքան իր ներգաղթը: Ան Այնճարի առաջին սերունդին պատկանելով ապրած է գիւղին առաջին տարիներուն տառապանքները, կրած բոլոր դժուարութիւնները եւ ամբողջ կեանքին ընթացքին աշխատասիրութեամբ պայքարած է կերտելու եւ բարւոք կեանք մը շնորհելու իր ընտանիքին:
Այնճարի հայրենաշունչ մթնոլորտին մէջ հասակ առած Փանոս Ֆէսլեան մանուկ հասակէն սնած է ազգային ոգիով եւ Մուսա Լերեան շունչով:
Ան իր ուսումը ստացած է Ազգային «Յառաջ-Գ. Կիւլպէնկեան» վարժարանէն ներս եւ ապա փոխադրուած Պէյրութ եւ աշխատած “Carrier” ընկերութեան մէջ որպէս հմուտ արհեստաւոր մինչեւ 1977, որմէ ետք սկսած է իր անձնական գործերուն եւ աշխատած Յորդանանի եւ Սէուտական Արաբիոյ մէջ եւ միշտ եղած փնտռուած արհեստաւոր:
Ամուսնացած է Վեհանուշ Չաքլեանի հետ եւ օրհնուած երկու դուստրերով՝ Ազատուհի եւ Փաթիլ:
Փանոս Ֆէսլեան եղած է եկեղեցասէր, եւ միշտ իր ներդրումը բերած «Ս. Պօղոս» եկեղեցւոյ եւ մանաւանդ ԼՕԽ-ի «Աղթամար» մասնաճիւղին:
Ան շարունակած է մինչեւ վերջին օր իր օգնութիւնը չխնայել իր շրջապատին: Եղած է ազգասէր, հայասէր եւ մանաւանդ Այնճարասէր: Յատուկ կապուածութիւն մը ունէր իր գիւղին հետ եւ կը փորձէր ամէն շաբաթավերջի Այնճար գտնուիլ, որովհետեւ Այնճարը իրեն համար ամէն բան էր:
Այս տխուր առիթով մեր ցաւակցութիւնները կը յղենք հանգուցեալին ընտանեկան պարագաներուն եւ բարեկամներուն:
Յուղարկաւորութեան արարողութիւնը պիտի կատարուի Ուրբաթ, 25 Ապրիլ 2025-ին, կէսօրէ ետք ժամը 2:00-ին, Այնճարի Սուրբ Պօղոս եկեղեցւոյ մէջ, ուրկէ հանգուցեալին մարմինը պիտի փոխադրուի Այնճարի Ազգային Գերեզմանատունը:
Յիշատակն արդարոյն օրհնութեամբ եղիցի:
