32.43c
Երեվան
կրկ, հնս 21
Այս տարուան Մայիս 14-ին կալանաւորուած Աւետիք Չալապեանի պաշտպանական խումբը Մայիս 25-ին Ա. Չալապեանի նկատմամբ կիրառուած խափանման միջոցի փոփոխութեան վերաբերեալ` ՀՀ Աժ պատգամաւորներ Սէյրան Օհանեանի, Իշխան Սաղաթէլեանի, Էլինար Վարդանեանի, Հայկ Մամիջանեանի, Տիգրան Աբրահամեանի, ՀՀ նախկին փոխվարչապետ Վաչէ Գաբրիէլեանի եւ «Արար» հիմնադրամի երաշխաւորութիւններով դիմած էր ՀՀ Գլխաւոր դատախազութիւն: Սակայն երաշխաւորութիւնները մերժուած են, ինչի առիթով Աւետիք Չալապեանի պաշտպանական խումբը յայտարարութիւն է տարածել:
Յայտարարութեան մէջ մասնաւորապէս կը նշուի.
«Դատախազը, ի վերջոյ, խախտելով միջնորդութիւնների քննարկման ժամկէտը, մեր հրապարակային անդրադարձից յետոյ ուղարկեց մեզ երաշխաւորութիւնների վերաբերեալ մերժման որոշումը: Դատախազը, անտեսելով երաշխաւորութիւնների հիմնարկի օրէնսդրական այն չափանիշը, որ իր որոշման հիմքում պէտք է դնի երաշխաւորութիւն տրամադրող անձի կամ կազմակերպութեան վստահութիւն վայելելու հանգամանքը, պարզապէս նշել է, որ «նախաքննութեան ներկայ փուլում չեն վերացել եւ պահպանուել են մեղադրեալ Ա․ Չալապեանի կալանքի տակ պահելու հիմքերն ու պայմանը եւ վարոյթն իրականացնող մարմինը գտնում է, որ տուեալ փուլում եւս կալանաւորումից բացի որեւէ այլ խափանման միջոց չի կարող գործուն երաշխիք հանդիսանալ մեղադրեալի պատշաճ վարքագիծն ապահովելու համարէ: Մի կողմ դնելով այն, որ մեր պնդմամբ ընդհանրապէս առկայ չեն կալանաւորման հիմքն ու պայմանները, նշենք, որ դատախազի եզրահանգումն ուղիղ հակադրւում է երաշխաւորութեան ինստիտուտի օրէնսդրական նշանակութեանը: Երաշխաւորութեան էութունը հէնց նրանում է, որ եթէ երաշխաւորները հանրային բարձր վստահութիւն վայելող անձինք են, ապա կալանաւորման հիմքերի եւ պայմանների առկայութեան դէպքում փոխւում է խափանման միջոցը: Կալանաւորման հիմքերի ու պայմանների վերացումն ինքնին վարոյթն իրականացնող մարմնի համար պարտականութիւն է առաջացնում` սեփական նախաձեռնութեամբ փոխել խափանման միջոցը: Ուստի, եթէ ակնկալուէր, որ կալանաւորումը կարող է փոխուել միայն այդ հիմքերի եւ պայմանների վերացման դէպքում, ապա երաշխաւորութիւն ներկայացնելը կ'իմաստազրկուէր եւ կը դառնար ինքնանպատակ: Դատախազութիւնը, փաստօրէն, աւելորդ ջանք չի փորձում գործադրել ապահովելու համար իր որոշումների թէկուզ թուացեալ պատճառաբանուածութիւնն ու հիմնաւորուածութիւնը: Փոխարէնը` յամառում է ամէն գնով եւ առանց հիմքի Ա․ Չալապեանին որքան հնարաւոր է երկար պահել անազատութեան մէջ: Բնականաբար, այս որոշումն անմիջապէս բողոքարկուելու է դատական կարգով, սակայն անհրաժեշտ ենք համարում ընդգծել, որ այս որոշումը եւս մէկ անգամ ապացուցում է, որ Հայաստանում գործող իշխանութեան պայմաններում քաղաքական գործերով քրէական արդարադատութեան ներպետական մեխանիզմները բացարձակ անարդիւնաւէտ են ու գործում են բացառապէս ըստ քաղաքական նպատակայարմարութունների»:
