21.09c
Երեվան
ուրբ, մյս 22
Պակիստանի ներքին գործերի նախարար Մոհսին Նաքվին, որը միջնորդական ջանքերի շրջանակում գտնվում է Իրանում, հանդիպում է ունեցել Իրանի արտգործնախարար Աբբաս Արաղչիի հետ։ Այս մասին հաղորդում է իրանական Tasnim լրատվական գործակալությունը։
Հանդիպման ընթացքում երկու պաշտոնյաները քննարկել են պատերազմը դադարեցնելու վերջին առաջարկները՝ ԱՄՆ-ի և Իրանի միջև մնացած անհամաձայնությունները լուծելու նպատակով:
Նաքվին Թեհրան է մեկնել մայիսի 20-ին և խորհրդակցություններ է անցկացրել իրանցի մի շարք բարձրաստիճան գործիչների, այդ թվում՝ նախագահ Մասուդ Փեզեշքիանի, Իրանի խորհրդարանի խոսնակ Մոհամմադ Բաղեր Ղալիբաֆի, ներքին գործերի նախարար Էսկանդար Մոմենիի և այլ պաշտոնյաների հետ։
Նրա այցը կենտրոնացած էր երկկողմ տնտեսական և գիտական համագործակցության ընդլայնման, իսլամական միասնության միջոցով տարածաշրջանային կայունության խթանման և Պակիստանի՝ որպես Իրանի և Միացյալ Նահանգների միջև բանակցություններում միջնորդի շարունակական դերի վրա։
Իրանցի պաշտոնյաներն ընդգծել են, որ տարածաշրջանային անվտանգությունը կարող է ապահովվել միայն արտաքին ուժերի դուրսբերման և հարևան իսլամական պետությունների միջև կապերի ամրապնդման միջոցով։
Թեհրանը բարձր է գնահատել Իսլամաբադի ջանքերը՝ լարվածությունը մեղմելու և երկխոսությունը խթանելու համար։
