Արամ Ա. Վեհափառ ընդունած է Լիբանանի մէջ Ռուսիոյ դեսպանը

Արամ  Ա.  Վեհափառ ընդունած է  Լիբանանի մէջ Ռուսիոյ դեսպանը

Ուրբաթ, 13 մայիս 2022-ին, Արամ Ա. վեհափառ հայրապետին այցելեց Լիբանանի մէջ Ռուսիոյ դեսպան Ալեքսանտր Ռուտաքով:

Աւելի քան ժամ մը տեւած հանդիպման ընթացքին տեղի ունեցած քննարկումներուն առանցքները բնականաբար դարձան Ուքրանիոյ պատերազմը եւ Հայաստանը: Յիշեալ հարցերուն գծով վեհափառ հայրապետը ներկայացուց իր պատկերացումները եւ մտահոգութիւնները:

Դեսպան Ռուտաքով, իր կարգին, պարզեց Ուքրանիոյ հարցին գծով Ռուսիոյ կեցուածքը եւ Հայաստանի ու Ազրպէյճանի միջեւ փոխադարձ հասկացողութեամբ լուծումներ որոնելու Ռուսիոյ ճիգը:

Հանդիպման աւարտին, վեհափառ հայրապետին ներկայութեան, կարճ հանդիպում մը տեղի ունեցաւ դեսպանին եւ Հայ յեղափոխական դաշնակցութեան Լիբանանի Կեդրոնական կոմիտէի ու Հայկական երեսփոխանական պլոքի ներկայացուցիչ, երեսփոխան Յակոբ Բագրատունիի միջեւ: Անոնք արծարծեցին յատկապէս Լիբանանի այժմու կացութեան եւ յառաջիկայ երեսփոխանական ընտրութիւններուն առնչուած հարցեր:

Նշենք, որ քանի մը օրեր առաջ վեհափառը անձնական նամակ մը ստացաւ ռուս եկեղեցւոյ պետ Քիրիլ Պատրիարքէն, որուն հետ վեհափառ հայրապետը երկար տարիներու բարեկամութիւն ունի` իբրեւ սերտ գործակիցներ միջեկեղեցական շարժումին մէջ: