8 յունիսի առաւօտեան, Ռուսիոյ հակաօդային պաշտպանութեան ուժերը Հիւսիսային Օսիոյ տարածքին մէջ ուքրանական անօդաչու թռչող սարք խոցած են, յայտարարած է Ռուսիոյ Դաշնութեան պաշտպանութեան նախարարութիւնը՝ չյայտնելով մանրամասնութիւններ։
Հիւսիսային Օսիոյ ղեկավար Սերգէյ Մենեայելօ յայտնած է, որ Մոզտոքի մէջ երեք ԱԹՍ խոցած են, անօդաչուները «թռած են ուքրանական կողմէն», եւ անոնց թիրախը եղած է ռազմական օդակայանը։ Զոհեր եւ աւերներ չկան՝ ընդգծած է ան։
Նախապէս տեղեկութիւն չէ եղած Հիւսիսային Օսիոյ մէջ անօդաչու թռչող սարքերու ոչնչացման մասին, որ մարտական գօտիէն զգալիօրէն հեռու է։ Հիւսիսային Օսիան եւ ուքրանական Զափորոժիէ քաղաքը ուղիղ գիծով բաժնուած են մօտ 900 քիլոմեթրով։
Բաց տուեալներու համաձայն՝ Մոզտոքի ռազմական օդակայանին մէջ տեղակայուած է ռուսական 485-րդ առանձին ուղղաթիռային գունդը։ Ուքրանական լրատուամիջոցները պնդած էին, որ անցեալ տարուայ գարունէն ի վեր Ռուսիա այդ օդակայանը սկսած է օգտագործել ռազմավարական ինքնաթիռներ ընդունելու եւ գործարկելու համար:
Ուքրանիոյ պաշտպանութեան նախարարութեան գլխաւոր հետախուզական վարչութեան անանուն ներկայացուցիչը Ukrainskaya pravda-ին յայտնած է, որ Մոզտոքի ռազմական օդակայանի վրայ կիրառուած են հայրենական արտադրութեան անօդաչու թռչող սարքեր: