12.09c
Երեվան
երք, մրտ 11
Ատրպէյճանի նախագահ Իլհամ Ալիեւ ըսած է, որ Շուշիի հռչակագիրը «պատմական նշանակութիւն» ունի եւ «նոր էջ կը բանայ ատրպէյճանա-թրքական ռազմավարական դաշնակցային յարաբերութիւններուն մէջ»:
Այս մասին ըսուած է Ալիեւի շնորհաւորական ուղերձին մէջ Թուրքիոյ նախագահ Ռեճեպ Թայիպ Էրտողանին` ծննդեան օրուան առիթով:
«Մենք մտադիր ենք ալ աւելի ընդլայնել եւ զանազանացնել եղբայրական Թուրքիոյ հետ մեր համագործակցութիւնն ու բեղմնաւոր կապերը, որոնք օրէ օր կը հարստանան նոր բովանդակութեամբ: Յարգելի Եղբայր, կը մաղթեմ Ձեզի քաջառողջութիւն, երկար տարիներու կեանք, երջանկութիւն, նորանոր յաջողութիւններ պատասխանատու գործունէութեան մէջ` յանուն Թուրքիոյ եղբայրական ժողովուրդի բարեկեցութեան եւ բարգաւաճման», ըսուած է ուղերձին մէջ:
Աւելի վաղ այս շաբաթ Իլհամ Ալիեւ «պատմական ձեռքբերում» որակած էր Ռուսաստանի եւ Ատրպէյճանի միջեւ դաշնակցային փոխգործակցութեան մասին Փետրուար 22-ին կնքուած հռչակագիրը:
«Ատրպէյճանը դաշնակցային յարաբերութիւններ ունի երկու մեծ երկիրներու, երկու հարեւաններու հետ: Չեմ կարծեր, թէ որեւէ այլ երկիր կրնայ պարծենալ անով: Չեմ խօսիր այն մասին, որ այդ երկիրներէն մէկը ՆԱԹՕ-ի անդամ է, միւսը` ՀԱՊԿ-ի ղեկավարը: Սա իսկապէս ձեռքբերում է», նշած էր Ալիեւ:
