20.09c
Երեվան
երկ, սպտ 16
Թուրքիոյ ներքին գործոց նախարար Սուլէյման Սոյլու մանրամասնութիւններ ներկայացուցած է երկրին մէջ բնակող սուրիացի փախստականներու թուաքանակին, քաղաքացիութիւն ստանալու, կենսապայմաններուն ու իրենց ծագման երկիր վերադառնալու կշռոյթներուն մասին:
Ըստ այդմ` այս պահին Թուրքիոյ մէջ ժամանակաւոր բնակութեան իրաւունքով 3 միլիոն 700 հազար արձանագրուած սուրիացի փախստական կայ: 2021-ի Դեկտեմբեր 31-ի դրութեամբ թրքական քաղաքացիութիւն ստացած է 193 հազար 293 սուրիացի, որոնցմէ 84 հազարը անչափահաս է:
2011-էն սկսեալ եկողները գրանցուած են ու պետութիւնը կը տիրապետէ անոնց բոլորին տուեալներուն: Սոյլուն նշած է, որ փախստականներուն հետ շարք մը համալրման միջոցառումներ կ'իրականացուին, այդ շարքին՝ թրքերէնի ուսուցում:
Թուրքիոյ մէջ բացարձակ թուաքանակով ամենաշատ սուրիացի բնակցուած է Պոլիսի մէջ` 535 հազար մարդ, ապա Կազիանթեփ (Այնթապ) (461 հզ.), Հաթայ (433 հզ.), Շանլըուրֆայ (Ուրֆայ) (428 հզ.), Ատանա (255 հզ.), Մերսին (240 հզ.), Պուրսա (183 հզ.) Իզմիր (149 հզ.), Անգարա (100 հզ.) նահանգներուն մէջ:
