«Ես այս ֆիլմին մէջ Րէպէքան՝ ազերի կին մը կը մարմնաւորեմ»,-  «Արեւելք»ին ըսաւ   ամերիկահայ  դերասանուհի Անն Պետեան:  Պետեան նաեւ ըսաւ,  որ   չորս ամիս է Ազրպէյճանի լեզուն կը սորվի,  «թէեւ կը պատկերացնէի հերոս հայ կին մը մարմնաւորել, սակայն բեմադրիչի որոշումն էր այս դերը, եւ ես ընդառաջեցի»: Պետեան, որ  դիտած էր  Ճիւան Աւետիսեանի  վերջին  ֆիլմը («Թեւանիկ») ,ըսաւ. «Հետը կապի մէջ էի եւ պատրաստակամութիւնս յայտնած էի գործակցելու: Րէպէքան յղի աղջիկ մըն է, մեծ  հարցեր ունի. չեմ ուզեր պատմել ֆիլմի մանրամասնութիւնները»,- շարունակեց Պետեան: Ան խօսելով  իր Հայաստան    տուած այցին  մասին,  ըսաւ՝ «Ես ամէն տարի Հայաստան կու գամ, երրորդ անգամ է որ Ղարաբաղ եմ:  Կը զբաղիմ ֆիլմարուեստով, սկսած եմ աշխատանքս որպէս դերասանուհի Գանատա,  Մոնթրէալ, անկէ անցայ Թորոնթօ,  եւ ապա Նիւ Եորք   ու Լոս Անճելըս: Մօտ տասներկու տարիէ դերեր կը խաղամ: Ընդհանրապէս հեռատեսիլային ֆիլմաշարերով ներկայացած եմ հանրութեան, հայերէն լեզուով առաջին գործս Վահէ Պէրպէրեանի հետ աշխատած եմ («Կեանք») թատրոնը, որ Պէյրութ ներկայացուելու հրաւէր ունէր, բայց դժբախտաբար չիրականացաւ: Կը մասնակցիմ  «Թալք Շո» ծրագիրներու, որոնցմէ ամենանշանաւոր եւ թարգմանուածը  «Լոս»  ֆիլմաշարն է, անոր ընդմէջէն շատեր՝  Մոսկուայի եւ  Պէյրութի մէջ  կը ճանչնան զիս: Ֆիլմին մթնոլորտին մասին խօսելով Անն ըսաւ. «Այս ֆիլմին խմբակը շատ հետաքրքրական  է, աշխարհի զանազան երկիրներէ ընտրուած, շատ լաւ կ'աշխատինք միասին: Ֆիլմին պատգամը, հաւատքի, յոյսի հետ կապուած է, զարմանալի, անհաւատալի անմեղութիւն կայ անոր մէջ, որ շատ հարազատ է գիւղի մթնոլորտին եւ մտածելակերպին»:«Ես շատ հպարտ եմ ու զգացուած եմ, այն աստիճան որ կը ցանկամ հոս մնալ ու ապրիլ այս հողին վրայ»,-  եզրափակեց  ամերիկահայ դերասանուհին: