19.09c
Երեվան
ուրբ, ապր 04
Օրերս Լիբանանի Զմմառու մայրավանքին մէջ ոգեկոչուած է յիշատակը՝ Հայ Կաթողիկէ միութեան հիմնադիր, մտաւորական, հրապարակագիր եւ խմբագիր հայր Անդրանիկ Ծ. Վրդ. Կռանեանի։
Ասոր մասին «Արեւելք» տեղեկութիւն քաղեց Հայ Կաթողիկէ Զմմառու Մայրավանքի պաշտօնական էջէն։
Ստորեւ տրուած հաղորդագրութիւնը
Կիրակի, 23 Մարտ 2025-ին, կէսօրուան ժամը 12-ին, Զմմառու մայրավանքի միաբաններու դամբարանին մէջ, ՀԿՄ-ի հիմնադիր` հանգուցեալ հայր Անդրանիկ Ծ.Վրդ.Կռանեանի հոգւոյն ի հանգիստ` հոգեհանգստեան պաշտօն կատարած է` միութեան նախկին հոգեւոր վարիչ եւ այժմու` Ս. Միքայէլ ընծայարանի եւ Երանելի Իգնատիոս Մալոյեան դպրեվանքի տեսուչ` Գեր.Կարապետ Վրդ.Գլընճեան։
Հոգեհանգստեան պաշտօնը կատարուած է ՀԿՄ-Զալքայի մասնաճիւղի հիմնադրութեան 23-րդ ամեակին առթիւ։
Արարողութենէն ետք` ՀԿՄ-ի 35-հոգինոց անդամները հանդիպում ունեցած են Զմմառու Պատրիարքական Կղերի Միաբանութեան Պատրիարքական Փոխանորդ եւ Զմմառու Վանքի Մեծաւոր Գերպծռ. Մաշտոց Թ.Ծ.Վ. Զահթէրեանին հետ, ուր տեղի ունեցած մտերմիկ զրոյց: ՀԿՄ-ի հոգեւոր վարիչ` Գեր. Լեւոն Վրդ. Ստեփանեան ներկայացուցած է միութեան ապագայ ծրագրերն ու հեռանկարները։
Այնուհետեւ միութեան հրամանատար` ընկ. Զաքար Զաքարեան խորհուրդի անդամներուն ընկերակցութեամբ` Մեծաւոր Հօր նուիրած են ձեռքի գործով պատրաստուած` միութեան փայտեայ զինանշանը։
Մեծաւոր հայրը իր հերթին անդամներուն իր ցուցմունքներն ու յորդորները փոխանցած է եւ իր նեցուկն ու աջակցութիւնը ի սպաս դրած ՀԿՄ-ի տրամադրութեան տակ, ըսելով «Զմմառը ձեր տունն է եւ մենք միշտ պատրաստակամ ենք ձեր կողքին յայտնուելու եւ ձեզ ընդունելու ձեր տունը` Զմմառ»։
Ապա տեղի ունեցած է կոկիկ հիւրասիրութիւն մը եւ յիշատակի լուսանկարով վերջ գտած` Գերյ. Անդանիկ Ծ. Վրդ. Կռանեանի յիշատակին նուիրուած օրը։
Նշենք, որ Հայր Անդրանիկ Կռանեան ծնած է Լիբանան, 20 Յունուար 1929 ին եւ վախճանած 27 Սեպտեմբեր 2017-ին Պէյրութ: Ան Զմմառու պատրիարքական կղերի միաբանութեան անդամ էր, հայագէտ, գրաբարագէտ, մտաւորական, հրապարակագիր, բառարանագէտ, խմբագիր եւ դաստիարակ:
