3.09c
Երեվան
ուրբ, փտր 27
Սամուէլ Բաբայեանի ղեկավարած «Միասնական հայրենիք» կուսակցութիւնը յայտարարութիւն տարածած է Արցախի Հանրապետութեան շուրջ ստեղծուած իրավիճակի կապակցութեամբ․
«Ս․թ․ սեպտեմբերի 19-ին ադրբեջանական ռազմական ագրեսիայի եւ դրան նախորդած ու յաջորդած ժամանակահատուածում Արցախի ինքնահռչակ իշխանութիւնների յանցաւոր գործունէութեան արդիւնքում հայ ժողովրդի լաւագոյն զաւակների կեանքի եւ առողջութեան գնով վաստակած, Հայաստանի եւ Սփիւռքի մեր քոյրերի եւ եղբայրների սոցիալ-տնտեսական եւ բարոյահոգեբանական մեծադիր ջանքերով փայփայած, Արցախի ժողովրդի ամէնօրեայ զրկանքներով կերտուած Արցախի պետականութիւնը փոշիացուեց։ Այնինչ, եթէ ոչ ինքնիշխան, ապա հայկական Արցախը ոչ միայն կայուն նախադրեալներ, այլեւ հեռանկար ունէր։
Բռնատեղահանուելուց եւ Հայաստանի Հանրապետութիւնում ապաստանելուց երկու շաբաթ անց «Միասնական հայրենիք» կուսակցութիւնը ձեւակերպել եւ Ազգային ժողովի նախագահի պաշտօնակատարի միջոցով Արցախի խորհրդարանին է փոխանցել «Արցախի Հանրապետութեան ապօրինի լուծարման հետեւանքների յաղթահարման շուրջ» օրակարգ, մասնաւորապէս առաջարկելով․
- Հրաւիրել խորհրդակցութիւն Արցախի ժողովրդի ներկայացուցչական մարմնի՝ Ազգային ժողովի պատգամաւորների եւ հասարակական-քաղաքական առաջնորդների մասնակցութեամբ։
- Ազգային Ժողովի անունից դիմել Արցախի Հանրապետութեան Գերագոյն դատարան՝ Հանրապետութիւնը լուծարելու վերաբերեալ ԱՀ նախագահի հրամանագրի եւ/կամ նոյնաբովանդակ յայտարարութեան սահմանադրականութեան հարցով։
- Ազգային Ժողովի որոշմամբ ձեւաւորել բռնատեղահանուած եւ ՀՀ-ում ապաստանած արցախցիների հիմնախնդիրներով զբաղող յատուկ ծրագրերի կոմիտէ։
- Յատուկ ծրագրերի կոմիտէին օժտել Լեռնային Ղարաբաղի կարգավիճակի եւ բռնատեղահանուած բնակչութեան վերադարձի շուրջ միջազգային հանրութեան եւ Ադրբեջանի հետ բանակցելու իրաւազօրութեամբ, դրա անհնարինութեան պարագայում՝ ՀՀ-ում վերաբնակեցման կազմակերպման իրաւասութեամբ։
Խորհրդարանականները, սակայն, չեն համաձայնել մասնակցել վերոնշեալ օրակարգով խորհրդակցութեան, որի պատճառների պարզումն ու հանրայնացումը լրագրողական համայնքի գործառոյթն է։
Խորհրդարանական երկրորդ՝ «Միասնական հայրենիք» կուսակցութիւնը, վերահաստատելով Ազգային ժողովի, որպէս միակ լեգիտիմ մարմնի պատասխանատւութիւնը, յայտարարում է, որ Ազգային Ժողովի չորս քաղաքական ուժերը դիսկոմֆորտ են ապրում նրանից, որ Ազգային Ժողովի նախագահին ֆորմալ առումով օրէնքի ուժով փոխարինում է «Միասնական հայրենիք» խմբակցութեան ներկայացուցիչ Գագիկ Բաղունցը, ուստի մեդիանախապատրաստութիւն են իրականացնում նրան ցանկալի մէկով փոխարինելու համար։
«Միասնական հայրենիք» կուսակցութեան դիրքորոշումն անփոփոխ է․ եթէ կառավարութիւն, ապա բացառապէս Արցախում, իսկ Արցախից դուրս՝ ժողովրդի կողմից ընտրուած Ազգային ժողովի, տեղական ինքնակառավարման մարմինների եւ հասարակական կազմակերպութիւնների կողմից ընտրուած մարմին՝ Արցախի ժողովրդի վերադարձի կամ վերաբնակեցման հարցերով զբաղելու գործառոյթով»։
