22.09c
Երեվան
երկ, սպտ 16
Հայց. Առաքելական Եկեղեցւոյ ԱՄՆ Արեւմտեան Թեմի Առաջնորդ՝ Գերշ. Տ. Յովնան արք. Տէրտէրեան օրերս հովուական այց մը տուած է «Վէնթուրա Քաունթի» շրջան։
Ստորեւ այդ մասին հրապարակուած հաղորդագրութիւնը։
Սոյն թուականի Օգոստոս 25-ին, Հիւսիսային Ամերիկայի Արեւմտեան Թեմի Առաջնորդ՝ Գերշ. Տ. Յովնան Արք. Տէրտէրեան հովուական այցելութեամբ ներկայ գտնուեցաւ Ventura County նիրակազմ համայնքի տարեկան դաշտահանդէսին ուր նաեւ Վերափոխման Տօնին առիթով նախագահեց խաղօղօրհնէքի արարողութեան: Սրբազան Հայրը դիմաւորուեցաւ Վէն Նայսի Սուրբ Պետրոս Հայաստանեայց Առաքելական Եկեղեցւոյ օգնական հովիւ՝ Արժապատիւ Գեւորք Քհնյ. Աբեանի եւ ծխական խորհուրդի անդամներուն կողմէ:
Իր սրտի խօսքին մէջ Առաջնորդ Սրբազանը նախ բարձր գնահատեց Տէր Գէորգ Քհնյ. Աբեանի նուիրեալ ծառայութիւնը, որ եկեղեցւոյ ու մեր հայկական արժէքներուն շուրջ կը համախմբէ համայնքի զաւակները եւ երիտասարդները: Բարձրաշնորհ Սրբազանը այս առթիւ գնահատեց մեծ թիւով ընտանիքներու եւ մանաւանդ պատանիներու ու երիտասարդներու մասնակցութիւնն ու անոնց ներգրաւումը համայնքային կեանքին, որ շօշափելի արտայայտութիւնն է Արեւմտեան Թեմի ողջ տարածքին տարուող հովուական, ծխական, երիտասարդական, շինարարական ու կրթական բազմաթիւ ծրագիրներուն, որոնք առողջ եւ կենսունակ կը պահեն համայնքներու կեանքը եւ կ՛երաշխաւորեն անոնց հզօրացումը:
