0.09c
Երեվան
երկ, դկտ 23
Հայաստանը հիմա կ՚աշխատի Ատրպէյճանի հետ խաղաղութեան եւ յարաբերութիւններու կարգաւորման պայմանագրի նախագծի վրայ եւ յոյս ունիմ, որ այս գործընթացը յաջողութեամբ կ՚աւարտի մօտակայ ամիսներուն: Այս մասին հոկտեմբեր 26-ին մեկնարկած «Թիֆլիսիի Մետաքսի ճանապարհ» չորրորդ միջազգային ֆորումին ունեցած ելոյթին ըսած է ՀՀ վարչապետ Նիկոլ Փաշինեանը՝ խօսելով տարածաշրջանի մէջ խաղաղութեան հաստատման հեռանկարներու մասին:
Ան յիշեցուցած է, որ Հայաստանն ու Ատրպէյճանը համաձայնութեան եկած են խաղաղութեան երկու կարեւոր սկզբունքի շուրջ. Պաքուն եւ Երեւանը փոխադարձաբար կը ճանչնան իրար տարածքային ամբողջանակութիւնն այն ընկալմամբ, որ ՀՀ տարածքը 29,800 քառակուսի քիլոմեթր է, Ատրպէյճանինը՝ 86,600 քառակուսի քիլոմեթր:
Յաջորդ սկզբունքն այն է, որ Հայաստանն ու Ատրպէյճանը համաձայն են սահմանի սահմանագծումն ու սահմանազատումը իրականացնել 1991-ի Ալմաթայի հռչակագրի հիման վրայ, ըստ որու՝ Խորհրդային Սոցիալիստական Հանրապետութիւններու Միութեան ժամանակ երկիրներու միջեւ գոյութիւն ունեցած վարչական սահմանները կը դառնան պետական սահմաններ:
«Մենք յոյս ունենք այս սկզբունքների հիման վրայ Ադրբեջանի հետ առաջիկայ ամիսներին ստորագրել խաղաղութեան եւ յարաբերութիւնների կարգաւորման պայմանագիր: Նաեւ յոյս ունեմ, որ առաջիկայում զարգացումներ կը լինեն Հայաստանի եւ Թուրքիայի միջեւ սահմանը երրորդ երկրների քաղաքացիների եւ դիւանագիտական անձնագիր կրողների համար բացման ուղղութեամբ, որը նոյնպէս դրական ազդակ կը բերի ամբողջ տարածաշրջանին», -ըսած է Փաշինեանը:
