15.09c
Երեվան
ուրբ, նմբ 22
Օրերս յաջողութեամբ աւարտած է ՀՄՄ-ի (Հայ Մարմնամարզական Միութիւն) Դամասկոսի մասնաճիւղի տարեկան բանակումը։
Բանակումը տեղի ունեցած է Սուրիոյ միակ հայկական աւան համարուող գեղանիստ Քեսապի մէջ։
Բանակումի վերջին օրը, ինչպէս ընդունուած է, տեղի ունեցած խարոյկահանդէսի արարողութիւն, որուն ներկայ եղած են Թեմակալ Առաջնորդն ու պատասխանատու անձնաւորութիւններ։
Այս մասին աւելի մանրամասն «Արեւելք» իմացաւ ՀՄՄ-ի Դամասկոսի մասնաճիւղի պաշտօնական էջէն, ուր մասնաւորապէս գրուած է.
«Դամասկոսի Հ.Մ.Մ.-ի սկաուտական բանակումը վերջ գտաւ Շաբաթ,24 Յուլիս 2021_ին երեկոյեան ժամը 6։00 շքերթով եւ ապա խարուկահանդէսով։Հանդէսը կը պատուէին Դամասկոսի հայոց թեմի առաջնորդ՝ Գերաշնորհ Տէր Արմաշ Եպս. Նալպանտեանը, ՝ Քեսապի Հայ Կաթողիկէ եկեղեցւոյ ժողովրդապետ՝ Հոգեշնորհ Տէր Նարեկ վրդ. Լուիսեանը, Քեսապի Հայ Աւետարանական եկեղեցւոյ հոգեւոր հովիւ՝ Պատուելի Շանթ Ակիշեանը, Սուրիոյ Խորհրդարանի անդամ տիկ. Լիւսի Իսկէնեանը, մեծարգոյ՝ Քեսապի գիւղապետ Վազգէն Չափարեանն ու իր ընտանիքը, ծնողներ և Քեսապահայ հոծ բազմութիւն։
Բացման խօսքով հանդէս եկաւ՝ ընկհ. Թալիկ Մլքիկեանը, ապա սկաուտական աստիճանի բարձրացում և երդման արարողութիւն կատարուեցաւ Հ.Մ.Մ._ի Սկաուտապետ և Հ.Մ.Մ.-ի Վարչութեան փոխ Ա. Պետ ընկ. Մանօ Սուվալեանի և ընկհ. Մլքիկեանի կողմէ։ Գնահատուեցան տիպար Սկաուտները, արենուշներն ու պատասխանատուները։ Խարոյկի կրակը վառեցին՝ Սրբազան հայրը, Տիկ.Իսկէնեանն ու Տիար Հայկ Օգումուշեանը։Գայլիկներն ու սկաուտները երգեցին երգեր, կանչեր ապա թատրոն։Ս.Դ.Հ.Կ.-ի Կեդրոնական վարչութեան փոխ Ա. Պետ՝ ընկ. Վազգէն Համալեանի խօսքը փոխանցեց՝ ընկհ. Էօժէն Ջուլֆայեանը։Խումբ մը Արենուշներ երկու պար պարեցին։ Շնորհակալ ենք բոլոր նուիրատուներէն, որոնք իրենց նիւթական թէ բարոյական աջակցութեամբ քաջալերեցին մեզ»։
Մասնաւոր շնորհակալութեան խօսք ունինք Սուրիոյ Հայ Աւետ. Եկեղեցւոյ Համայնքապետ՝ Վեր. Յարութիւն Սէլիմեանին, Ք.Ջ.Ա.Կ-ը մեզի տրամադրելուն համար։
