21.28c
Երեվան
երկ, հնս 29
Հայկական կողմը խնդրած է յետաձգել Հայաստանի, Ռուսիոյ եւ Ատրպէյճանի արտաքին գործոց նախարարներու հանդիպումը՝ հաշուի առնելով Լաչինի միջանցքին մէջ առկայ իրավիճակը։ Այս մասին «Արմէնփրէս»ին յայտնած է Հայաստանի ԱԳՆ մամուլի խօսնակ Վահան Յունանեանը:
Ռուսիոյ Դաշնութեան արտաքին գործոց նախարարութիւնը քիչ առաջ յայտնած էր, որ Ռուսիոյ, Հայաստանի եւ Ատրպէյճանի արտաքին գործոց նախարարներ Սերկէյ Լաւրովի, Արարատ Միրզոյեանի եւ Ճէյհուն Պայրամովի վաղուան հանդիպումը պիտի չկայանայ, քանի որ հայկական կողմը հրաժարած է մասնակցութենէ։ Հանդիպման պէտք է քննարկուէր խաղաղութեան պայմանագրի նախապատրաստումը։
Յունանեան նշած է, որ հայկական կողմը Մոսկուայի մէջ կայանալիք հանդիպման մասնակցութեան իր պատրաստակամութիւնը հաստատած էր շուրջ 2 շաբաթ առաջ՝ մինչեւ Ատրպէյճանի կողմէ Լաչինի միջանցքի ապօրինի արգելափակումը։
«Ակնյայտօրէն ԱԳ նախարար Արարատ Միրզոյեանի աշխատանքային առաջնահերթութիւնն այս պահին 2020 թ. նոյեմբերի 9-ի եռակողմ յայտարարութեանը համապատասխան Լաչինի միջանցքի անխոչընդոտ վերագործարկման եւ Լեռնային Ղարաբաղում հումանիտար ճգնաժամի հետեւանքով ստեղծուած խնդիրների հասցէագրումն է, ինչից ելնելով հայկական կողմը խնդրել է յետաձգել Մոսկուայում նախատեսուած հանդիպումը»,– ընդգծած է ԱԳՆ մամուլի խօսնակը։
Անոր խօսքով` ի նշան Ատրպէյճանի հետ յարաբերութիւններու կարգաւորման գործընթացին մէջ հայկական կողմի կառուցողականութեան՝ անկախ հանդիպման հանգամանքէն` Ատրպէյճանին փոխանցուած են յարաբերութիւններու կարգաւորման վերաբերեալ փաստաթուղթի առնչութեամբ հայկական կողմի նոր առաջարկները։
