4.09c
Երեվան
չրք, փտր 05
Կասկածելի մօտեցումներով գրուած կարճ լրատուութեան մը մէջ «Ալ Քուտս» կայքը գրած է, թէ Հալէպ բնակող սուրիահայերը տօնախմբութիւններ կը կատարեն` ի տես ընդդիմադիր շրջանակներու տիրապետութեան տակ եղող շրջաններու պաշարման: Աղբիւրը նաեւ կը յայտնէ, որ Սուրիոյ պետական կայաններու կողմէ պատրաստուած րէբորթաժներուն մէջ հալէպահայեր ուրախութեամբ եւ տօնական մթնոլորտով մը ընդունած են ընդդիմադիր շրջաններու պաշարման լուրը: Իր կարգին Սուրիոյ տագնապին առընթեր իր ծայրայեղ կեցուածքներով յայտնի «Ալ Ճազիրա» կայանի լրագրող Հարէս Ապտըլ Հաք, իր Ֆէյսպուքեան էջով պահանջած է ետ վերցնել hալէպահայերու սուրիական հպատակութիւնը: Լրագրողը նաեւ ըսած է, որ այդ մէկը պէտք է կատարուի Սուրիոյ իշխանութիւններուն պարտութիւնէն ետք: Լուրը մեկնաբանութեան կարիք չունի, ու առաջին անգամը չէ, որ իրենց ծայրայեղական կեցուածքներով յայտնի կողմեր նման հատուածական շահարկումի թեմա կը դարձնեն հալէպահայութեան կեցուածքները: Հակառակ անոր, որ սուրիահայութիւնն ու մասնաւորապէս հալէպահայութիւնը միշտ զգուշաւոր եղած են դժուարին պայմաններէ անցնող Հալէպի զարգացումներուն դիմաց, երեւելի է, որ մութ ուժեր կը փորձեն ջուր լեցնել հակահայ , բայց եւ այնպէս «դանաեան տակառ»ի տեսակ եղող հակահայկան մոլուցքին: Աւարտին հարկ կը համարենք նշել, որ «Ալ Քուտս» կայքի սոյն լուրը խմբագրուած է կայքի «Կազի այնթէպ» շրջանի լրագրողին կողմէ: Ու այս պարագային է, որ պէտք է ըսել, թէ բոլոր մեկնաբանութիւնները աւելորդ են, որովհետեւ յայտնի են այս «նամակ»ին իրական հեղինակները:
