0.09c
Երեվան
կրկ, դկտ 22
«Հայե՛ր, միացե՛ք», «Գետաշեն», «Հպա՛րտ գնացե՛ք» երգերի հեղինակ, «Հայկազունք» երաժշտական համույթի գեղարվեստական ղեկավար, Հայաստանի Հանրապետության մշակույթի վաստակավոր գործիչ, Արցախյան պատերազմի մասնակից, «Երկրապահ» կամավորների միության անդամ Գուսան Հայկազունը «Անկախ»-ին ասել է, որ հաղթահարել է մեկ տարի առաջ ի հայտ եկած առողջական լուրջ ճգնաժամը եւ պատրաստ է բեմ դուրս գալ:
«Իմ բուժման համար մեծ գումարներ ծախսվեցին, և այդ հարցում ինձ օգնեցին իմ ընկերները, իմ ազգը՝ ծանոթ-անծանոթ: Ես իմ ազգի ցավը տանեմ, որ կանգնեց իմ թիկունքին: Իսկ Հայաստանի ոչ մի փողատեր մի դրամով անգամ չօգնեց,- կայքին ասել է Գուսան Հայկազունը՝ նշելով, որ ինքը չի էլ դիմել մեծահարուստներին, քանի որ տարիներ շարունակ գործնական հարցերով դիմել է նրանց և հասկացել, որ դա անիմաստ է,- Հոբելյանական համերգներ են եղել, երգարանի հրատարակություն է եղել, դիսկերի թողարկման հարց է եղել և, վերջապես, ամեն մի երգը գրելուց հետո այն ներկայացնելու, տարածելու խնդիր է եղել: Մի խոսքով՝ շատ հարցերով եմ դիմել ու միշտ մերժվել եմ»:
Նոյեմբերի 23-ին Արամ Խաչատրյան մեծ համերգասրահում տեղի է ունենալու համերգ, որի ժամանակ հնչելու են Գուսան Հայկազունի երգերը՝ լավագույն կատարողների մասնակցությամբ: Համերգի խորագիրն է` «Հայե՛ր, միացե՛ք, մենք պահանջատեր ենք»:
Չնայած մեծ ծախսերին՝ Գուսանի համար այդ համերգը մեծ նշանակություն ունի, քանի որ հիվանդությունից հետո խորհրդանշելու է իր վերադարձը բեմ: Ստեղծագործական այլ ծրագրեր էլ կան, որոնք հիվանդության պատճառով կիսատ են մնացել ու հիմա պետք է իրականացվեն,- գրում է կայքը:
