-2.91c
Երեվան
կրկ, փտր 23
Բոլորս միասնական պիտի պաշտպանենք Արցախը, հնարաւորութիւնը կայ փրկելու Արցախը: Այս մասին 30 հոկտեմբերին, Արցախի Վերածնունդի հրապարակին մէջ հանրահաւաքի ժամանակ յայտարարած է Արցախի արտաքին գործոց նախարար Դաւիթ Բաբայեան:
«Այն, որ բոլորդ կանգնած էք այստեղ, պատգամ է ամբողջ աշխարհին, մարդկութեանը: Մենք ապրում ենք օրհասական ժամանակահատուած՝ առերեսուելով գոյաբանական վտանգների: Նաեւ Մայր Հայաստանը եւ Սփիւռքն են առնչւում նման գոյաբանական վտանգների: Այս ամէնը յաղթահարելու համար պէտք է աշխատենք եւ ներքին,եւ արտաքին ոլորտներում: Ամենակարեւորը անտարբեր չլինելն է: Հենց անտարբերութիւնը մեզ կարող է կործանել: Կարծես թէ անմեղ բան է երբ ասում ենք՝ ի՞նչ է կախուած ինձնից: Ոչ, իւրաքանչիւրիցդ է կախուած մեր ապագան, լինելո՞ւ է յաղթանակ, թէ՝ պարտութիւն»,-ըսած է Բաբայեան:
Դաւիթ Բաբայեանի խօսքով՝ արտաքին ոլորտի մէջ պէտք է ըլլալ սկզբունքային, տեղ տալ արհեստավարժութեան եւ հայրենասիրութեան: Ան յիշեցուցած է, որ անընդունելի է որեւէ փաստաթուղթ, ուր Արցախը կրնայ դիտարկուիլ որպէս Ատրպէյճանի մաս:
«Մենք մերժելու ենք նման ցանկացած առաջարկ: Եթէ նման բան մեզ ներկայացնեն միջազգային ատեաններից, դիտարկելու ենք որպէս միջազգային իրաւունքի կոպտագոյն խախտում: Հաւատացէք՝ ի վիճակի ենք պաշտապանել Արցախը, կայ այդ ներուժը, այն ձեզնից իւրաքանչիւրի մէջ է: Մեր ճակատագիրը միասնական է: Չի լինելու ոչ մի խաղ ժողովրդի մէջքի ետեւում: Մենք բարձր ենք գնահատում Ռուսաստանի դերակատարութիւնը տարածաշրջանում եւ խաղաղապահ առաքելութեան բարդ աշխատանքը: Երբ մենք ասում ենք, որ հայ եւ ռուս ժողովուրդները եղբայրական են, դա ուղղուած չէ այլ ժողովրդի դէմ: Եկէք համախմբուենք ու չյուսահատուենք. կան բոլոր շանսերը պահելու մեր երկիրը»,- յայտարարած է Դաւիթ Բաբայեան:
