Արաբական աշխարհի մեծն Ֆէյրուզը 81 տարեկան է (Տեսանիւթ)

Արաբական աշխարհի մեծն Ֆէյրուզը  81   տարեկան  է (Տեսանիւթ)

Արաբական  աշխարհի  անուանի երգչուհին ՝ Ֆէյրուզը  այսօր  81  տարեկան դարձաւ:  Լիբանանի    էսթրատային     երգարուեստի    աստղերէն հանդիսացող   Ֆէյրուզ,  շնորհիւ իր ոգեղէն  ձայնին, կատարումներուն եւ բարձր արուեստի  դաւանումին,   անցնող  աւելի քան     քառասուն տարիներուն  դարձաւ ոչ միայն  համալիբանանեան   ներկայութիւն մը, այլ  համայն արաբներուն դէպի  «աստղերը Լիբանանի եւ արաբներու դեսպան»ը:

Տարբեր  առիթներով   «Փառաց պսակ  կրող  թագուհի»    անուանուած՝ Ֆէյրուզի   յաջողութեան   մէջ      կեդրոնական   դեր ունեցաւ  անոր  կեանքի ընկերը, երաժիշտ  եւ երգահան Ասի Րահպանին ու  Ասիի   եղբայրը բանաստեղծ Մանսուր Րահպանի:

Լիբանանեան  մշակոյթի արդի  պատմութեան մէջ արաբական շրջանակերուն մօտ Ֆէյրուզի կատարումները ստեղծեցին «Ֆէյրուզեան երգարուեստ»  անունով ժանր մը, որ դարձաւ  արաբ երիտասարդութեան  կիզակէտը եւ  իտէալը:  

Ֆէյրուզ երգեց Պէյրութի մասին,  Երուսաղէմի,  Դամասկոսի,  Պաղտատի ու Մաքքէի մասին: Արաբ-իսրայէլեան  հակամարտութեան ամէնէն թէժ  օրագրութեան մէջ  Ֆէյրուզի երգերը եղան խաղաղութեան  կոչնակներ, ու այդ երգերուն  մեղեդիները   հասան մինչեւ Երուսաղէմ, Կազա, Մարոք   եւ Թունիզիա:

Ֆէյրուզի՝ հայութեան հետ   առկայ առնչութիւնները  քիչ չեն: Րահպանիներու թատերական ներկայացումներու ամէնէն փառաւոր  օրերուն պոլսահայ բեմադրիչ Պերճ Ֆազլեանն էր, որ   հայութեան «դեսպան»ը եղաւ  արուեստի այդ մեծ ընտանիքին մօտ: Աւելի ուշ   երաժիշտ Ալեքսան Մնակեան եւս   իր ուրոյն        յօրինումներով եւ երաժշտական վաստակով կարեւոր տեղ  գրաւեց Րահպանիներու աշխարհին մէջ: Տակաւին  այլ  տասնեակ  անուններ ալ կան, որոնց մէջ     պէտք է յիշատակել  դերասան  Ղազարոս Ալթունեանը,      խմբավար եւ երաժիշտ Կարէն  Տուրկարեանը, խմբավար ՝  Յարութ Ֆազլեանը եւ   ուրիշներ:

Ֆէյրուզն  այսօր 81 տարեկան է:  Անոր խոհուն ներկայութիւնը եւ աղօթքի ոգեղէնութեան հասնող   երգերը կը շարունակեն մնալ  արաբական աշխարհի    ընդհանուր  պատկերը  եզերող    մշտական  արժէքներ:

Մաղթելով  երգչուհիին    երկար եւ   արեւշատ տարիներ՝  վստահ ենք, որ ան այսօր ալ կը համալրէ լիբանանցի անմահանուն գործիչներու    հսկայ  փաղանգը: