23.09c
Երեվան
հնգ, օգս 13
«3+3» տարածաշրջանային հարթակի երկրորդ հանդիպման արդիւնքներով համատեղ հաղորդագրութիւն տարածուած է, որ բաժնեկցած է ՀՀ Արտաքին գործոց նախարարութիւնը, եւ որ ամբողջութեամբ կը ներկայացնենք ստորեւ․
«2023-ի հոկտեմբերի 23-ին Իրանի արտաքին գործերի նախարարի հրաւէրով եւ Հայաստանի, Ադրբեջանի, Ռուսաստանի եւ Թուրքիայի արտաքին գործերի նախարարների մասնակցութեամբ տեղի է ունեցել «3+3» տարածաշրջանային հարթակի երկրորդ հանդիպումը:
Նախարարները.
1. Հաշուի առնելով երկրների միջեւ փոխադարձ շահերի եւ բարիդրացիական հարեւանութեան վրայ հիմնուած յարաբերութիւնների զարգացման կարեւորութիւնը`ընդգծել են այդ առումով վէճերի խաղաղ կարգաւորման, ինքնիշխանութեան յարգման, քաղաքական անկախութեան, տարածքային ամբողջականութեան, միջազգայնօրէն ճանաչուած սահմանների անխախտելիութեան, ներքին գործերին չմիջամտելու, սպառնալիքի կամ ուժի կիրառման արգելքի եւ մարդու իրաւունքների յարգման կարեւորութիւնը` Միաւորուած ազգերի կազմակերպութեան կանոնադրութեան բոլոր սկզբունքների հիման վրայ:
2. Արտայայտելով իրենց դիրքորոշումները միջազգային տարբեր հարցերի շուրջ՝ քննարկել են տարածաշրջանում առկայ ամենակարեւոր հարցերը եւ ընդգծել այնպիսի հարթակների, ինչպիսին է տարածաշրջանային խորհրդատուական «3+3» հարթակի կարեւորութիւնը՝ կառուցողական երկխօսութեան հնարաւորութիւններ ապահովելու եւ տարածաշրջանի այն երկրների միջեւ փոխշահաւէտ համագործակցութիւն հաստատելու համար, որոնք առաջնային դեր ունեն այդ առումով։
3. Կարեւորել են տնտեսական համագործակցութեան դրական ազդեցութիւնը փոխադարձ վստահութեան ամրապնդման, ազգերի բարեկեցութեան եւ տարածաշրջանի կայունութեան վրայ։
4. Ընդգծելով մշակութային համագարծակցութեան, մարդկանց միջեւ շփումների եւ կրթական, գիտական, զբօսաշրջութեան, մշակոյթի եւ սպորտի ոլորտներում համատեղ նախագծերի կարեւորութիւնը:
5. Տեւական խաղաղութեան եւ տնտեսական զարգացման խթանման համար պէտք է ամրապնդեն երկկողմ եւ բազմակողմ խորհրդակցութիւններն ու փոխգործակցութիւնը:
6. Ողջունելով տարածաշրջանի բոլոր երկրների միջեւ յարաբերութիւնների կարգաւորմանն ու զարգացմանն ուղղուած ընթացող գործընթացները:
7. Դրական գնահատելով այս հանդիպման արդիւնքները`նրանք վերահաստատել են, որ այս հարթակը բաց է Վրաստանի հաւասար մասնակցութեան համար:
8. Նախարարները նաեւ մտքեր են փոխանակել Գազայում իրավիճակի վերաբերեալ: Նրանք ընդգծել են անմեղ քաղաքացիական անձանց թիրախաւորման անյապաղ դադարեցման անհրաժեշտութիւնը:
9. Հայաստանի Հանրապետութեան, Ադրբեջանական Հանրապետութեան, Թուրքիայի Հանրապետութեան եւ Ռուսաստանի Դաշնութեան արտաքին գործերի նախարարները շնորհակալութիւն են յայտնել Իրանի Իսլամական Հանրապետութեան արտաքին գործերի նախարարին`լաւ ընդունելութեան եւ այս հանդիպման բարեյաջող անցկացման համար: Գնահատելով տարածաշրջանում վստահութեան եւ համագործակցութեան միջավայրի ընդլայնման եւ ամրապնդման հարցում «3+3» տարածաշրջանային հարթակի պարբերական հանդիպումները՝ նրանք պայմանաւորուել են, որ յաջորդ հանդիպումը կայանալու է Թուրքիայում, որի անցկացման ամսաթիւը կը համակարգուի դիւանագիտական խողովակների միջոցով»,-ըսուած է հաղորդագրութեան մէջ։
