8.99c
Երեվան
երկ, ապր 20
Թալ Ապեատի մէջ կ'ապրին շուրջ 15 հայ ընտանիքներ: «Արեւելք» այս մասին տեղեկացաւ շրջանի իր աղբիւրէն: Մեր աղբիւրը նաեւ յայտնեց, թէ տեղի հայ բնակչութիւնը լաւ կապեր ունի շրջանի ապահովութիւնը ստանձանած քրտական YPK-ի ( PKK-ի սուրիական թեւը) ղեկավարութեան հետ եւ կը վայելէ անոնց հոգածութիւնը: Ըստ մեր աղբիւրին, քիւրտերը կարելի բոլոր միջոցներով կ'օժանդակեն մեր հայրենակիցիներուն: Թալ Ապեատի հայ բնակիչները գլխաւորապէս կը զբաղին հողագործութեամբ եւ ինքնաշարժներու նորոգութեան գործերով եւ Սուրիոյ այլ շրջաններուն հետ համեմատած անոնց վիճակը տանելի է: «Արեւելք»ի աղբիւրը նաեւ ըսաւ, որ վերջին շաբաթներուն Թալ Ապեատի հայ բնակիչները Կիրակի օրերը շրջանի միակ եկեղեցին կ'այցելեն եւ հաւաքական աղօթք կ'ընեն: Նշենք, որ «Արեւելք»ի տեղադրած լուսանկարը առնուած է անցեալ Կիրակի օր «Սուրբ Խաչ» եկեղեցիին մէջ տեղի ունեցած աղօթքի արարողութեան ընթացքին: Մեր աղբիւրը նաեւ ըսաւ, որ ապահովական պայմաններու բերումով շրջանին մէջ հայ կրօնաւորներ չկան, սակայն այդ մէկը չի խանգարեր, որ անոնք իրենց կրօնական պարտականութիւնը ըստ արժանւոյն կատարեն: Յիշեցնենք, որ Թալ Ապեատը կը գտնուի Սուրիա-Թուրքիա սահմանին մերձ:
