24.87c
Երեվան
ուրբ, հնս 19
Լիբանանահայութիւնը եւ յատկապէս Լիբանանի Հնչակեան ընտանիքը երէկ հանդիսաւոր կերպով տօնախմբած է ՍԴՀԿ Լիբանանի օրկան «Արարատ» օրաթերթի 80-րդ տարեդարձը:
Այս մասին «Արեւելք» տեղեկութիւն ստացաւ Պէյրութի իր աղբիւրէն: Մեր աղբիւրին փոխանցմամբ «Արարատ»ի ամեակին նուիրուած ձեռնարկը տեղի ունեցած է «Ֆորում Տէ Պէյրութ» համալիրին մէջ ներկայութեամբ ՝ լիբանանահայ գաղութը ներկայացնող մեծ թիւով պատասխանատուներու եւ գործիչներու, ինչպէս նաեւ «Արարատ»ի մեծ ու փոքր ընտանիքի անդամներուն:
Միջոցառման կարդացուած է Ն.Ս.Օ.Տ.Տ. Գարեգին Բ.ն Ամենայն Հայոց եւ Ն.Ս.Օ.Տ.Տ. Արամ Ա. Մեծի Տանն Կիլիկիոյ Կաթողիկոսներուն այս առթիւ պատրաստած կոնդակները, ինչպէս նաեւ ՀՀ Սփիւռքի նախարար Տիկին Հրանոյշ Յակոբեանի շնորհաւորական գիրը:
Հուսկ բանի խօսքեր արտասանած են Լիբանանի թեմի Առաջնորդ Տ. Շահէ եպս. Փանոսեանը, Հայ Կաթողիկէ եւ Աւետարանական համայնքներու ներկայացուցիչները, Լիբանանի մօտ ՀՀ Դեսպան Պրն. Սամուէլ Մկրտչեանը, Լիբանանի ՀՅԴ օրկան «Ազդակ» օրաթերթի խմբագիր Շահան Գանտահարեանը, «Արարատ»ի նախկին աշխատակիցներէն անուանի լրագրող Սարգիս Նաճարեանը, հայրենի մտաւորական եւ «Արարատ»ի աշխատակից Էտուարտ Գրիգորեանը,ինչպէս նաեւ «Արարատ»ի տնօրէն Տիկն. Անի Եփրեմեան-Սարաֆեանը:
Ձեռնարկին բացման խօսքը կատարած է թերթի աշխատակիցներէն լրագրող ՝ Շիրազ Ճէրէճեանը, որ նոյնպէս հանդիսաւոր կերպով վարած է ձեռնարկը:
Հանդիսութեան ընթացքին խօսք առնողները, ինչպէս նաեւ կարդացուած ուղերձներուն ընդմէջէն հայ եկեղեցւոյ նուիրապետական աթոռներու Վեհափառ հայրապետները շեշտը դրած են հայ մամուլի առաքելութեան վրայ, նշելով, որ 80-ամեայ ճանապարհ անցած «Արարատ»ը շնորհիւ իր ձեռնհաս տնօրէնութեան եւ խմբագրական կազմին ու աշխարհասփիւռ աշխատակացիներուն, ինչպէս երէկ այսօր ու վաղն ալ պիտի շարունակէ մնալ պատնէշի վրայ: Խօսք առնողները նաեւ կարեւորած են լիբանանահայ համայնքի հաւաքական կեանքին մէջ «Արարատ»ի ունեցած դերակատարութիւնը շեշտելով նաեւ, որ թերթը այսօր դարձած է բոլորին համար արտայայտուելու առիթ տուող կարեւոր ամպիոն մը:
Հանդիսութեան ընթացքին գործադրուած է ձեռնարկին խորհուրդը փոխանցող գեղարուեստական յայտագիր, ինչպէս նաեւ ներկաներուն բաժնուած է այս առթիւ հրապարակուած «Արարատ 80- ամեակ» խորագիրը կրող գրքոյկը:
