19.09c
Երեվան
չրք, մյս 06
Լիբանանէն ստացուած լուրերը աւելի քան մտահոգիչ են. խնդիրն այն է, որ ամերիկեան տոլարին դիմաց լիրայի անկասելի դարձած գահավիժումը կրնայ իր ծանր հետեւանքներն ունենալ երկրի ամենատարբեր ոլորտներուն, բայց մանաւանդ ժողովուրդի ամէնօրեայ սնունդի անհրաժեշտ ոլորտին վրայ։ Լիբանանի մասին վերլուծութիւններ ներկայացնող տարբեր աղբիւրներ կը գրեն, որ երկրի բնակիչներուն անհրաժեշտ սնունդ եւ ուտեստեղէն ապահովող մեծ ընկերութիւններ մտադիր են դադրեցնել սնունդի ներածումը, եւ այդ մէկը կրնայ ունենալ բաւական ծանր հետեւանքներ։
Սննդեղէն ներածող ընկերութիւնները այդ որոշումին կրնան յանգիլ տեսնելով տոլարին բարձրացումը, բան մը որ կը նօսրացնէ անոնց գնողական ուժը։
Օրինակ, մինչ անցնող շաբաթներուն այդ վաճառականները եւ հաստատութիւնները ստիպուած էին մէկ տոլարի համար վճարել մինչեւ 3500 լիբանանեան լիրա, այսօր անոնք կանգնած են «կոտրած տաշտակ»ի առջեւ, ոչ միայն անոր համար, որ երկրի ելեւմտական շուկաներուն մէջ տոլարի պակաս կը զգացուի, այլ անոր համար, որ «սեւ շուկայ» անունով յայտնի շուկային մէջ տոլարը սկսած է վաճառուիլ մինչեւ 8000 լիբանանեան ոսկիի։
Կարգ մը վաճառականներ, խօսելով լրատուական ծառայութիւններու, նկատել տուած են նաեւ, որ այսօրուան դրութեամբ աշխատանքի իւրաքանչիւր օր իր հետ կը բերէ մեծ վնասներ, որովհետեւ իրենց վաճառած ապրանքը վերստին գնելու համար անոնք ստիպուած են վճարել աւելի մեծ գումարներ եւ այդպիսով մատնուիլ մեծ վնասներու։
Բաց աստի մեծ վաճառատուներէն, սնունդ վաճառող ընկերութիւններէն եւ մեծաքանակի վաճառականներէն բացի փոքր խանութպանները եւս կը դիմագրաւեն նոյն հարցերը, այդպիսով մաս կազմելով համընդհանուր փակում մը ստեղծելու առընթեր տարուած ճիգերուն։
Լիբանանցի վաճառականը, որ երկրին համար մինչեւ այս օրերը կարողացաւ արտասահմանէն հատիկեղէն, կաթնեղէն, պանրեղէն եւ տարբեր տեսակի ուտեստներ ներածել, այսօր դէմ հանդիման է մեծ բարդութիւններու եւ այս բոլորին դիմաց աւելի քան երեւելի է, որ դրամական շուկային մէջ տոլարի «աննորմալ» բարձրացումին դէմն առնել չկարողացող կառավարութիւնը այդ վաճառականներուն օգնութեան հասնելու ոչ մէկ ներուժ ունի։
Գլխաւոր հարցը, որ այսօր կը հնչէ Պէյրութի, Թրիփոլիի, Սայտայի, Սուրի եւ տարբեր լիբանանեան քաղաքներուն մէջ այն է, որ արդեօ՞ք Լիբանան պիտի յայտնուի սովի ճիրաններուն մէջ։
Իրօք, որ իրավիճակը խորապէս մտահոգիչ է եւ յղի անսպասելի եւ կործանիչ հետեւանքներով։
