20.09c
Երեվան
երք, մյս 05
Մէկ օր ուշացումով կը սպասուի, որ Անգարա եւ Թէլ Աւիւ այսօր վերահաստատեն դիւանագիտական երկողմ յարաբերութիւնները: Այս մասին լուր փոխանցող աղբիւրներ կը նշեն, որ Անգարա կը պատրաստուի Պոլսոյ մէջ եղող պաղեստինեան «Համաս» շարժումի զինուորական ներկայայցուցիչները վտարել երկրէն: Կը հաղորդուի նաեւ, որ Թուրքիոյ նախագահը երէկ հեռախօսային կապ հաստատած է Պաղեստինի նախագահ Մահմուտ Ապպասին հետ եւ վերջինիս հետ քննարկած համաձայնութեան առնչուող հարցեր: Ըստ արաբական աղբիւրներու, Թէլ Աւիւ համաձայնած է փոխհատուցում վճարել թրքական «Մաւի Մարմարա» նաւուն վրայ զոհուածներու ընտանիքներուն: Թուրքիա իր կարգին պահանջած է ամբողջութեամբ վերացնել Կազայի վրայ դրուած պաշարումը, որը սակայն մերժուած է Նաթանահիաուի կառավարութեան կողմէ: Կը խօսուի նաեւ, որ Անգարա Համասի եւ Թէլ Աւիւի միջեւ միջնորդի դեր կրնայ կատարել իսրայէլացի սպաննուած զինուորներու դիակներու վերադարձման հարցով: Մինչեւ այս պահը յստակ չէ, թէ Իսրայէլ ինչ գումարներ պիտի տրամադրէ թուրքերուն, սակայն երեւելի է, որ յարաբերութիւնները պիտի դառնան աւելի ջերմ, քան ինչ էին, 2010էն առաջ: Յիշեցնենք, որ երկու երկիրներուն միջեւ յարաբերութիւնները վատթարացած էին 2010 -ին, երբ թրքական «Մաւի Մարմարա» մարդասիրական նաւը փորձած էր կոտրել Կազայի դէմ եղած պաշարումը: Իսրայէլեան ուժայիններու կրակին հետեւանքով զոհուած էին նաւուն վրայ եղող 10 թուրք աքթիւիստներ:
