22.77c
Երեվան
երկ, հնս 22
«Վախցած աղաւնիի հոգեվիճակին մէջ է,
աղաւնիները իրենց գոյութիւնը կը շարունակեն
քաղաքի խորքերու եւ մարդկանց խիտ բազմութեան
մէջ, գուցէ քիչ մը վախկոտ, բայց անկա՜խ»...
Հրանդ Տինք
21 Յունուար 2018-ի, առաւօտեան ժամը 10:30-ին, Գիւմրիի՝ հայ կաթողիկէ Սրբոց նահատակաց Աթոռանիստ եկեղեցւոյ մէջ` կիրակնօրեայ պատարագը բարձրացաւ` ի յիշատակ Հրանդ Տինքի նահատակութեան 11-րդ տարելիցին:
Պատարագիչ հայր սուրբը` եկեղեցւոյ ժողովրդապետ՝ Գեր. Մաշտոց Վրդ. Զահթէրեան, իր քարոզին մէջ` նախ անդրադարձաւ Տինքի կենսագրական տուեալներուն, ապա անոր դէմ գործուած սահմռկեցուցիչ ոճիրին` անոր ետին թաքնուած մութ ծալքերուն եւ մեծ ոյժերուն, որոնք կը փորձեն փաստերը ի սպառ վերացնել որպէսզի չբացայայտուին ոճրագործները: Հայր սուրբը աւելցուց թէ՝ անոր նահատակութիւնը դրդող ազդակ հանդիսացաւ անոր ճանապարհը շարունակողներուն, ու աւելցնելով՝ թէ ան այսօր իսկ իր գաղափարակից հերոսներու միջոցաւ կը շարունակէ պայքարիլ եւ իրականացնել իր երազը: Ապա, Հրանդ Տինքի ոճիրին շուրջ կատարուած հետաքննութեան ընթացքի մասին մանրամասնելով եզրափակեց իր խօսքը:
Յաւարտ Ս. եւ Անմահ Պատարագի` տեղի ունեցաւ հոգեհանգստեան պաշտօն ի յիշատակ մէկուկէսին գումարած մէկի հոգւոյն հանգիստին համար, զոր 11-տարիներ առաջ Յունուարի 19-ին, օր ցերեկով զոհուեցաւ, պարզ այն պատճառաւ, որ հայ էր եւ կը փորձէր հայութեան ձայնը աշխարհին լսելի դարձնել:
Դիւան՝ Գիւմրիի Սրբոց Նահատակաց Եկեղեցւոյ քարտուղարութեան
