Կը ներկայացնենք յայտնի հայ գործարար, «Տաշիր» ընկերութիւններու խումբի նախագահ Սամուէլ Կարապետեանի` հայրենակիցներուն ուղղուած ուղերձի ամբողջական գրութիւնը:
«Թանկագին հայրենակիցներ,
Հայաստանն ու Արցախն այսօր դժուարին, առանց չափազանցութեան` ողբերգական ժամանակներ են ապրում: Գրւում է հայ ժողովրդի պատմութեան ամենատրամաթիկ էջերից մէկը: Հերոսական դիմադրութիւն ցոյց տալով թուով եւ սարքաւորումով զգալիօրէն գերազանցող ատրպէյճանա-թուրքական զաւթիչ զօրքերին, կորցնելով մեր զինուորների հազարաւոր անգնահատելի կեանքերը` մենք այնուամենայնիւ ձախողեցինք պատերազմում: Լեռնային Ղարաբաղի Հանրապետութիւնը կորցրեց իր տարածքի զգալի մասը:
Մենք պէտք է խոստովանենք եւ ստիպուած ենք արձանագրել, որ Հայաստանում գործող կառավարութիւնը չկարողացաւ կառավարել հայկական պետականութիւնը: Այն չկարողացաւ կատարել իր ամենակարեւոր պարտականութիւններից մէկը` ապահովել հայկական բանակի մարտունակութիւնը եւ Արցախի ժողովրդի անվտանգութիւնը: Նրա վարած ներքին եւ արտաքին քաղաքականութիւնը սխալ էր եւ աղէտի յանգեցրեց: Այս աղէտի մաշտապները մի քանի անգամ աւելի մեծ կը լինէին, եթէ չլինէին Ռուսաստանի Դաշնութեան նախագահ Վլատիմիր Փութինի միջնորդական ջանքերը, բացառապէս որոնց շնորհիւ յաջողուեց դադարեցնել պատերազմը եւ պահպանել Արցախը:
Ռազմական գործողութիւնների դադարեցումից յետոյ մեր Հայրենիքը յայտնուեց շուտափոյթ լուծում պահանջող ամենաբարդ քաղաքական, տնտեսական եւ ընկերային խնդիրների առջեւ: Եւ ուստի մենք չենք կարող ժամանակ կորցնել եւ իրաւունք չունենք զբաղուել ինքնախաբէութեամբ: Մենք բոլորս եւ առաջին հերթին հենց ինքը` ներկայիս կառավարութիւնը, պէտք է խոստովանենք, որ մի շարք պատճառներով վարչապետ Փաշինեանն ու ներկայիս կառավարութիւնն այլեւս ի վիճակի չեն հայ հասարակութեան ներուժը դնել կառուցողական հունի մէջ, համախմբել ժողովրդին եւ անցնել մեր առջեւ կանգնած լուրջ խնդիրների լուծմանը:
Այս իրավիճակից միայն մէկ ճիշդ ելք կայ` անարիւն իշխանափոխութիւն: Վարչապետի եւ կառավարութեան անյապաղ հրաժարական, նախարարների անցումային գրասենեակի ձեւաւորում եւ արտահերթ խորհրդարանական ընտրութիւնների անցկացում, որոնց ժամանակ Հայաստանի քաղաքացիները նոր իշխանութիւն կ'ընտրեն:
Մենք պէտք է ամենակարճ ժամկէտներում սկզբունքօրէն նոր օրակարգ ձեւաւորենք Հայաստանի զարգացման համար: Իրատեսական ճանապարհային քարտէզ ստեղծենք մեր տնտեսութեան վերականգնման համար: Որոշենք երկրի արտաքին քաղաքականութեան ճիշդ վեկտորը (միջաշառաւիղ-Խմբ.)` հաշուի առնելով տեղի ունեցած իրադարձութիւնների փորձը: Հնարաւորինս արագ բուժենք վէրքերը, վերադարձնենք ազգի հաւատն իր ուժերի նկատմամբ եւ սկսենք Հայաստանի եւ Արցախի վերածնունդը:
Վստահ եմ, որ մենք կարող ենք դա անել: Առջեւում մեր յաղթանակների ժամանակն է, եւ մենք այն բաց թողնելու իրաւունք չունենք»:
